დილერების მოლოდინით ახალი ავტომობილების გაყიდვები წლიურად საშუალოდ 15-20%-ით გაიზრდება 2023 წელს, — ამის შესახებ galt&taggart-ის კვლევაში „ავტომობილების ბიზნესი საქართველოში“ არის აღნიშნული.

კვლევის მიხედვით, მიმდინარე წლის მოლოდინები პოზიტიურია, ავტორიზებული დილერები წლიურ ზრდას ელოდებიან გაყიდვებში როგორც ახალ, ასევე მეორად ავტომობილებში (8-9%).

„გლობალურად, ახალი ავტომობილების დეფიციტმა გაზარდა ფასები ახალ და მეორად ავტომობილებზე 2021-22 წლებში. 2021-22 წლებში საქართველოს ავტომობილების ბიზნესი გლობალურის მსგავსი გამოწვევების წინაშე იდგა, ავტომობილებზე მიწოდების შეზღუდვებსა და გაზრდილ ფასებს თან ერთვოდა გაზრდილი სატრანსპორტო ხარჯები.

 2023 წლის მოლოდინები პოზიტიურია, თუმცა, მიწოდებასთან და ფასებთან დაკავშირებული შეზღუდვები შესაძლოა 2023 წელსაც გაგრძელდეს, ზოგიერთი ბრენდი განსაკუთრებით მოწყვლადია ამ გამოწვევების მიმართ. დაფინანსების ხელმისაწვდომობის ზრდამ შესაძლოა ხელი შეუწყოს ახალი მანქანების ბაზრის განვითარებას საქართველოში, 0-2 წლის ავტომობილების გაყიდვებში დილერების დაბალი წილის გათვალისწინებით. მეორადი ავტომობილების ბაზარზე ასევე არსებობს ზრდის შესაძლებლობა, განსაკუთრებით რეგიონებში“, — აღნიშნულია კვლევაში.