„ახალი ობლიგაციების დაბალი საპროცენტო განაკვეთით, ბიუჯეტი დაახლოებით 350 მლნ ლარს დაზოგავს“, - ამის შესახებ ფინანსთა მინისტრმა ლაშა ხუციშვილმა სამინისტროში გამართულ პრესკონფერენციაზე განაცხადა.
„ფინანსთა სამინისტრომ წარმატებით დაასრულა 500 მლნ აშშ დოლარის ღირებულების ევრობონდების გამოშვება. საპროცენტო განაკვეთმა (coupon rate) შეადგინა 2,75%. ახალი ობლიგაციებით მოხდა 2011 წელს გამოშვებული ევროობლიგაციების რეფინანსირება, რომლის საპროცენტო განაკვეთი დაახლოებით 2,5-ჯერ მაღალი იყო და 6.875%-ს შეადგენდა, რომლის დაფარვაც მიმდინარე წლის 12 აპრილს განხორციელდა.
მნიშვნელოვანია ასევე, ბიუჯეტის მხრივ კონკრეტული ეკონომიები. კერძოდ, მომდევნო 5 წლის განმავლობაში, იმის გამო, რომ საპროცენტო განაკვეთი არის გაცილებით დაბალი, ბიუჯეტი დაახლოებით 350 მლნ ლარის საპროცენტო შემოსავალს დაზოგავს. ასეთი დაბალი საპროცენტო განაკვეთის ერთ-ერთი ძირითადი განმაპირობებელი ფაქტორი არის ქვეყნის სუვერენული რეიტინგი, რომელიც ბოლო წლებში გაუმჯობესდა.
გარდა ამისა, ევროობლიგაციების გამოშვების დროს საერთაშორისო ინვესტორების მხრიდან უპრეცედენტოდ მაღალი აქტიურობა დაფიქსირდა. მოთხოვნამ დაახლოებით, 4-ჯერ გადააჭარბა გამოცხადებულ თანხას. ეს პირველ რიგში, საერთაშორისო ინვესტორების მხრიდან ქვეყნის ეკონომიკისადმი ძალიან დიდ ნდობას ნიშნავს.“, - განაცხადა ლაშა ხუციშვილმა.
აღსანიშნავია, რომ 2021 წლის 12 აპრილს საქართველოს მთავრობას 500 მილიონი დოლარის მოცულობის 10-წლიანი ევროობლიგაციები დაფარა. ეს ფასიანი ქაღალდები საქართველოს მთავრობამ საერთაშორისო საფინანსო ბაზარზე 2011 წელს განათავსა და მათი მეშვეობით 2008 წელს გამოშვებული 500 მილიონი დოლარის ევროობლიგაციების რეფინანსირება მოახდინა.