„გუდაურში წელს სეზონი სამწუხაროდ არც დაწყებულა, მზადება იყო ძალიან კარგი, ბევრი ჯავშნები გვქონდა, თუმცა საახალწლოდ ყველა გაუქმდა“,- ამის შესახებ რადიო „კომერსანტის“ გადაცემაში „კომერსანტის დილა“  ორგანიზაცია „დაიცავი მთის კურორტების“ დამფუძნებელმა და საქართველოს მთის კურორტების ასოციაციის პრეზიდენტმა გიორგი სალუქვაძემ ისაუბრა.

გიორგი სალუქვაძის თქმით, წელს მოჭარბებული დაინტერესება ისრაელისგან იყო და ბევრმა ებრაულმა კომპანიამ გუდაურის სასტუმროებთან და აპარტოტელებთან წინასწარი ჯავშნები გააფორმეს, თუმცა თოვლის არარსებობის გამო ეს ჯავშნები გაუქმდა.

„გარდა იმისა, რომ თოვლის არარსებობა სრიალის მოყვარულებისთვის დიდი ტრაგედიაა, ეს ტრაგედიაა ბიზნესისთვისაც, რადგან მათ ზამთრის სეზონისთვის განსაკუთრებული მზადება სჭირდებათ. წლევანდელი სეზონისთვის ბიზნესს სრული მობილიზაცია ჰქონდა და ახალი წელი, რომელიც მათთვის ყველაზე  სარფიანია ხოლმე, ჩავარდა.

საქართველოს კურორტები, რომლებზეც სრიალი შეიძლება, ესენია ჰაწვალი, გოდერძი  ბაკურიანი და გუდაური, არ შეიძლება რომ ერთ კონტექსტში  განვიხილოთ, რადგან მაგალითად მესტიაში თუ ზაფხულის სეზონი ჩავარდა, მას ზამთრით შეუძლია დეკომპენსირება, იგივეა  ბაკურიანშიც,  ბაკურიანი როგორც  ზამთარში, ასევე ზაფხულში სრული დატვირთვით მუშაობს, მიუხედავად ბევრი მცდელობისა, ველოსპორტის  განვითარების მცდელობისა, გუდაურს ზაფხულში ჯერჯერობით ეს  დინამიკა  არ აქვს“, - აღნიშნა გიორგი სალუქვაძემ.

რაც შეეხება გუდაურის  ხელოვნურ  გათოვლიანებას, სალუქვაძე აღნიშნავს, რომ წელს  სისტემა მუშაობს, ხელოვნური თოვლიც ჩამოიყარა, თუმცა მთის  ტრასის სააგენტოში აცხადებენ, რომ ხელოვნური გათოვლიანებისთვის  ბუნებრივი თოვლიც საჭიროა.

„მთის  ტრასების  სააგენტოს  არ  აქვს  ჩამოყალიბებული პოზიცია, როგორც არაოფიციალურად  გაჟღერდა, ამბობენ, რომ წყლის მომარაგების პრობლემაა და ტრასების გათოვლიანებისთვის  საკმარისი წყალმომარაგება არ არის. ერთი ტრასის  გათოვლიანება მაინც  რომ მოხდეს, ეს  იქნება სტიმული კაფე-ბარებისთვისაც, რომ მათ მუშაობა  შეძლონ“, - აღნიშნა გიორგი სალუქვაძემ.