გერმანელ მომხმარებლებს 2023 წლიდან ბუნებრივ აირზე და ელ-ენერგიაზე გაზრდილი გადასახადის გადახდა მოუწევთ, მიუხედავად ხელისუფლების მიერ გატარებული მთელი რიგი ღონისძიებებისა, რომელიც მიმართული იყო ენერგიაზე ფასის ზრდის შესაკავებლად. ამის შესახებ გერმანული გამოცემა Handelsblatt წერს.
მისი მონაცემებით, საოჯახო მეურნეობებს, რომლებიც წლიურად 20 ათას კუბურ მეტრზე მეტ გაზს მოიხმარენ, იანვრიდან მოუწევთ საშუალოდ 2756 ევროს გადახდა, ნაცვლად 1457 ევროსი, რაც 112%-იანი მატებაა 2021 წლის შემოდგომასთან შედარებით, როცა ტარიფების მატება დაიწყო. ელ-ენერგიის მომხმარებლებს კი საშუალოდ 44%-ით მეტის გადახდა მოუწევთ, ასევე 2021 წლის შემოდგომასთან შედარებით. თუ საოჯახო მეურნეობები საშუალოდ წლიურად 4 ათას კვტს ელ-ენერგიას მოიხმარდნენ, მათ მოუწევთ წლიური 1764 ევროს გადახდა. ხელისუფლების ჩარევამ კი ამ მიმართულებით ფასების ზრდა მხოლოდ 5%-ით შეაკავა - წერს გამოცემა.
ნოემბრის ბოლოს გერმანიის ხელისუფლებამ გაზზე, ელექტროენერგიაზე და გათბობაზე ფასის შეზღუდვის ზომები დაამტკიცა. მოსალოდნელია, რომ რეგულირების მექანიზმი მოქმედებას დაიწყებს 1-ლი მარტიდან. ფასების შეკავება მოხდება საოჯახო მცირე მეურნეობებისთვის და მცირე ბიზნესისთვის, რომელთა მოხმარება შეადგენს 1,5 გიგავატ საათზე ნაკლებს წლიურად. მათთვის გაზის საფასურის დადგენა მოხდება კვტს-ზე 12 ცენტის ოდენობით, ელ-ენერგიაზე კი 40 ცენტამდე ერთ კვტს-ზე. ცენტრალიზებული გათბობის ფასი კი შეიზღუდება 9,5 ცენტამდე ერთ კვტს-ზე.
შეგახსენებთ, ევროპაში ენერგეტიკული კრიზისი ივლისის შუა რიცხვებიდან დაიწყო, მას შემდეგ, რაც დაიწყო რუსეთიდან გაზის მიწოდების პირველი შეფერხება. ამის შემდეგ ევროკომისიამ მოუწოდა ევროკავშირის ქვეყნებს, სრულად შეწყვიტონ რუსეთიდან გაზის მიღება და შემოიღო 15%-ით ნაკლები გაზის მოხმარების გეგმა, რომელიც იმოქმედებს 2022 წლის 1-ლი აგვსიტოდან 2023 წლის 31 მარტამდე.
გერმანია
