ევროკავშირი სანქციების საკითხში წარმომადგენლის დანიშვნას აპირებს, რომელიც სხვადასხვა ქვეყანაში, მათ შორის თურქეთში, სანქციების მკაცრ შესრულებას შეუწყობს ხელს. ინფორმაციას Financial Times (FT) წყაროებზე დაყრდნობით ავრცელებს.
გამოცემის თანახმად, იანვრიდან ახალი თანამდებობის დაკავება ევროკავშირის ყოფილ ელჩს აშშ-ში, დევიდ ო სალივანს სთხოვეს, რომელსაც მიეცემა უფლებამოსილება, უხელმძღვანელოს ევროკომისიის ძალისხმევას, რომ სანქციების სრული დაცვა მთელს მსოფლიოში უზრუნველყოს. ევროკავშირის მაღალჩინოსანმა FT-ს განუცხადა, რომ ახალ კადრს, სავარაუდოდ, სამშაბათს დაამტკიცებენ. გამოცემის შეფასებით, პუტინის რეჟიმის წინააღმდეგ დაწესებულ სანქციებში ხარვეზების აღმოფხვრას ევროკავშირი, აშშ და სხვა მოკავშირეები სულ უფრო მეტ ყურადღებას უთმობენ.
ევროკავშირის სამიზნე ქვეყნებს შორის არის თურქეთიც, რომელმაც კრემლის წინააღმდეგ ევროკავშირის სანქციების შესრულებაზე უარი განაცხადა. კერძოდ, აშშ და ევროკავშირი მოითხოვენ, რომ ანკარამ ბრძოლა გააძლიეროს ტრეიდერების წინააღმდეგ, რომლებიც აკრძალული საქონლის მიწოდებით ცდილობენ, რუსეთის სამრეწველო და თავდაცვის პროდუქტებზე დაწესებულ მკაცრ საექსპორტო კონტროლს გვერდი აუარონ.
ევროკავშირის ახალი თანამდებობა ნაწილობრივ გაიმეორებს აშშ-ის სანქციების კოორდინატორ ჯიმ ო ბრაიენის როლს, რომლის სამუშაოც სანქციებში ამერიკის მოკავშირეებთან თანამშრომლობის გაძლიერებას მოიცავს.
ამჟამად დევიდ ო სალივანი საერთაშორისო და ევროპულ საქმეთა ინსტიტუტის ანალიტიკური ცენტრის დირექტორია. მანამდე, 2014-დან 2019 წლამდე, ის აშშ-ში ევროკავშირის ელჩი იყო. უფრო ადრე ო სალივანი ევროკომისიაში მაღალ თანამდებობებს იკავებდა, მათ შორის მუშაობდა გენერალურ დირექტორად ვაჭრობის საკითხებში.
ევროკავშირი
