პანდემიის და ჰორეკა სექტორის არაერთხელ სრულად დახურვის შემდეგ, პოსტპანდემიური 2022 წელი სექტორისთვის შთამბეჭდავი გამოდგა - ამის შესახებ ,,ბიზნესპრესნიუსთან“ რესტორატორთა ასოციაციის ხელმძღვანელი საუბრობს.
შოთა ბურჯანაძე ამბობს, რომ არა მხოლოდ პანდემიასთან, 2019 წელთან შედარებითაც კი, სექტორის ნაწილის ოპერირება წარმატებული იყო.
„შთამბეჭდავი, ასე შეიძლება შეფასდეს 2022 წელი ერთი სიტყვით. მით უფრო, რომ კოვიდის შემდეგ სექტორს დიდი პრობლემები ჰქონდა, ზრდა უფრო მოულოდნელი იყო. ეს ეხება, როგორც ადგილობრივ მომხმარებელს, ასევე ტურისტულ ნაკადებს. შესაბამისად, სფეროსთვის წელი შეიძლება დადებითად შეჯამდეს“, - აცხადებს ბურჯანაძე.
მისი თქმით, რესტორნების ერთ-ერთი მთავარი პრობლემა ინფლაციაა.
,,ჩვენთვის გამოწვევაა ინფლაცია, რომელიც სფეროს ეხება, თუმცა სფეროს ფასები ვეღარ გაიზრდება, რადგან მომხმარებლის მხრიდან უარყოფითი უკუკავშირია. კოვიდ პერიოდთან შედარებით, შეიძლება ითქვას, რომ გარკვეული მიმართულებებით ფასები შემცირდა, მაგრამ სარესტორნო სფეროში, რომელიც დიდწილად იმპორტირებულ საქონელზეა დამოკიდებული, ფასების ზრდა გარდაუვალი იქნება, თუ გლობალური ინფლაციაც არ შემცირდა. ეს არის ერთიანობაში 2022 წლის რიცხვები და ის, რასაც სფეროზე ასახვა აქვს. ის, რაც 2020-2021 წელს სფერომ გადაიტანა, ახლა გარკვეული რეანიმირების პროცესია. პრობლემები რაც არსებობდა, გარკვეულად დარჩა, რადგან ზოგი სრულად გაკოტრდა და დახურა ფილიალები, მაგრამ დიდი ნაწილისთვის წელი დადებითი იყო, არამხოლოდ 2021 წელთან, არამედ პანდემიამდელ 2019 წელთან შედარებითაც კი“ - განაცხადა ბურჯანაძემ ,,ბიზნესპრესნიუსთან“.
რესტორატორთა ასოციაცია
