აზარტული თამაშების რეკლამის განთავსების აკრძალვა მედიაში (სატელევიზიო, ასევე ნებისმიერი ტიპის ვებგვერდზე) არაეფექტური, ასევე არამართებული რომ იყო და ასეთი აკრძალვა მნიშვნელოვნად დააზარალებდა სარეკლამო ბაზარს, მედიასაშუალებების ფინანსურ დამოუკიდებლობას, ეს თავიდანვე ცხადი იყო, ცხადი იყო ისიც, რომ გლობალურ ქსელში, გაუკონტროლებელი აღმოჩნდებოდა უცხოური საიტები (როგორც აზარტული თამაშების ვებგვერდები, ასევე ის საიტები სადაც ქართული რეკლამები ისევ ტრიალებს). შედეგად, ლუდომანიასთან ბრძოლის სახელით დაწყებული „ბრძოლა“, მედიის წინააღმდეგ გალაშქრებადაც იქცა.

საქმე ისაა, რომ აკრძალვიდან 5 თვეში ფაქტია, რომ კანონპროექტი მხოლოდ ქართულ ვებგვერდებს შეეხო და უცხოურ საიტებზე (უბრალოდ გასართობ საიტებზე და არა აზარტული თამაშების ვებგვერდებზე) ქართული აზარტული თამაშების რეკლამირება გრძელდება. 

რეგიონული მაუწყებლების ალიანსის დირექტორი ნათია კუპრაშვილი „კომერსანტთან“ ამბობს, რომ კანონპროექტი ძალიან ნაჩქარევად მიიღეს და გარდა იმისა, რომ მან მედია საშუალებებს დიდი პრობლემები შეუქმნა, კონტროლის პრობლემაც აშკარაა.

„თავიდანვე აშკარა იყო, რომ ასეთი საკანონმდებლო ცვლილებები მედიაში ვერ მოაგვარებდა იმ პრობლემებს რომლებიც ლუდომანებს აქვთ. ამას ჩვენი ალიანსი ვხედავდით ისე, როგორც უცხოეთში ხდება, გარდამავალი პრევენციის სახით და არა ასეთი ხისტი აკრძალვით. საბოლოოდ გამოვიდა რომ სამიზნე ჯგუფები არ არიან დაცული ამ რეკლამისგან, მედიამ კი უეცრად დაკარგა დიდი შემოსავალი. გამოდის, რომ ქართულ მედია სივრცეში გვაქვს აკრძალვა, თუმცა ეს არ ეხება უცხოურ მედია არხებს. საბოლოოდ გამოვიდა, რომ ონლაინ კაზინოებს და აზარტული თამაშებით დაინტერესებულ ბიზნესს ეს აღარ აინტერესებს, რადგან მათ გამოსავალი ნახეს, გადაინაცვლეს ე.წ. ჩრდილოეთ სივრცეში და თავის მხრივ ეს ლუდომანებისთვის უფრო დიდი პრობლემა გახდა, დაზარალებული კი ისევ მედია აღმოჩნდა“, — ამბობს ნათია კუპრაშვილი.

„ახალგაზრდა ფინანსისტთა და ბიზნესმენთა ასოციაციის“ ხელმძღვანელი გიორგი კაპანაძე პრობლემას  არა კანონპროექტში, არამედ მის კონტროლში ხედავს.

„ინტერნეტ სივრცეში აუცილებელი იყო, რომ მომხდარიყო რეკლამის აკრძალვა ანუ ის სადაც წვდომა აქვთ არასრულწლოვნებს, როდესაც რთულია ამის გამიჯვნა, მაშინ სრულად აკრძალვის მომხრე ვარ. თუ კი დღეს მაინც გვხდება უცხოურ საიტებზე რეკლამა, აქ უკვე აღსრულებასთან გვაქვს პრობლემა და აუცილებელია მონიტორინგი და კონტროლი აქტიურად მოხდეს. თუ კი ჩვენ ვამბობთ, რომ ინტერნეტსივრცეში აკრძალულია რეკლამა, მართალია ეს რთულია, მაგრამ მაქსიმალურად უნდა მოხდეს მონიტორინგი, რადგან ინტერნეტსივრცე დიდია, თუმცა სხვა შემთხვევაში აზრი არ აქვს, მისი ეფექტი ძალიან მცირე ექნება. განსაკუთრებით ისეთი უცხოური საიტები რომლებიც ხშირად მოხმარებადია ქართველების მიერ, ამის სტატისტიკა არსებობს, უნდა მოხდეს მისი მონიტორინგი და კონტროლი“, — აცხადებს „კომერსანტთან“ გიორგი კაპანაძე.

ნინო თამაზაშვილი