აზერბაიჯანის ერთადერთი მიზანი მთიანი ყარაბაღიდან სომხების განდევნა არ არის. ამ პროვოკაციული ქმედებებით აზერბაიჯანი სამშვიდობო დღის წესრიგის,სამშვიდობო მოლაპარაკებების ჩაშლას და რეგიონში ახალი ომის პროვოცირებას ცდილობს — ამის შესახებ განცხადება სომხეთის პრემიერ-მინისტრმა ნიკოლ ფაშინიანმა მთავრობის სხდომაზე გააკეთა.
„რა თქმა უნდა, ჩვენ ყველანი ძალიან ემოციურები ვართ ლაჩინის დერეფნის დახურვისა და ჰუმანიტარული კრიზისის გამო, რომელიც წარმოიშვა მთიან ყარაბაღში. მაგრამ კიდევ ერთხელ უნდა ხაზგასმით აღვნიშნო, რომ ამ სიტუაციაში, განსაკუთრებით ხელისუფლების მხრიდან, აუცილებელია თავის შეკავება, უნდა ვიყოთ თანმიმდევრულები, რომ წინ წავიწიოთ სამშვიდობო დღის წესრიგში და არ გადავუხვიოთ ამ დღის წესრიგს რაიმე პროვოკაციების გამო“, - განაცხადა ფაშინიანმა.
სომხეთის მთავრობის ხელმძღვანელის თქმით, ომის პროვოცირებასთან ერთად, აზერბაიჯანს მთიანი ყარაბაღიდან სომხების განდევნა სურს. ფაშინიანის განცხადებით, აზერბაიჯანი საერთაშორისო საზოგადოებას არწმუნებს, რომ ლაჩინის დერეფანი არ დახურულა და მთიან ყარაბაღში გაზისა და ელექტროენერგიის მიწოდება არ შეწყვეტილა, თუმცა სომხეთი საპირისპიროს ამტკიცებს.
„ჩვენს ხელთ არსებული ინფორმაციით, ბაქოს გეგმა ასეთია: ეკონომიკური, ფსიქოლოგიური ზეწოლა გარკვეულ კულმინაციამდე მიიყვანოს, რის შემდეგაც დერეფანი რამდენიმე დღით გაიხსნას მთიანი ყარაბაღის სომხების მასობრივი გამოსვლის მოლოდინით, შემდეგ კი დახუროს და გახსნას რამდენიმე დღით. ასე გაგრძელდება, ვიდრე უკანასკნელი სომეხი არ დატოვებს მთიან ყარაბაღს“, – განაცხადა სომხეთის პრემიერ-მინისტრმა.