2022 წელს აზერბაიჯანმა 30 ქვეყანაში 26 მლნ ტონაზე მეტი ნავთობის ექსპორტი განახორციელა. აქედან ყველაზე მეტი ნავთობი გაყიდა იტალიაში, ისრაელსა და ინდოეთში.

რაც შეეხება საქართველოს, საქსტატის მონაცემებით, 2022 წელს საქართველოში იმპორტირებული 1,330,515.56 ტონა ნავთობპროდუქტებიდან აზერბაიჯანის წილი, 51,438.70 ათასი დოლარის, 59,273.05 ტონა ნავთობი და ნავთობპროდუქტებია.

აზერბაიჯანის სახელმწიფო საბაჟო კომიტეტის ანგარიშზე დაყრდნობით APA იუწყება, რომ 2022 წელს აზერბაიჯანმა იტალიაში 6,640,524,17 ათასი აშშ დოლარის ღირებულების 8,902,201,85 ტონა ნავთობი გაიტანა და ამ მონაცემებით ის აზერბაიჯანის ნავთობის მთლიან ექსპორტში პირველ ადგილზეა.

აზერბაიჯანის ნავთობის მთლიან ექსპორტში (ექსპორტირებული ნავთობის რაოდენობისა და ღირებულების მიხედვით - რედ.) მეორე ადგილი ისრაელმა დაიკავა. 2022 წელს ისრაელში 1 672 358.2 ათასი დოლარის 2 289 417.59 ტონა ნავთობია ექსპორტირებული.

ინდოეთი აზერბაიჯანის ნავთობის ექსპორტის სიაში მესამე ადგილს იკავებს. გასულ წელს ამ ქვეყანაში 1,625,428,01 ათასი დოლარის ღირებულების 2,016,842,39 ტონა ნავთობია ექსპორტირებული.

ინფორმაციის თანახმად, აღნიშნულ მაჩვენებლებში გათვალისწინებული იყო ექსპორტირებული ნავთობის ღირებულება, რომლის გაფორმება საბაჟო ორგანოებმა საანგარიშო პერიოდში დაასრულეს. როგორც სიიდან ჩანს, საანგარიშო პერიოდში 30 ქვეყანაში 19,483,623,56 ათასი დოლარის ღირებულების 26,024,201,67 ტონა ნავთობი გაიტანა.