აზერბაიჯანს სურს გამოიყენოს ბაქო-სუფსის ნავთობსადენი, რომელიც ამჟამად არ მუშაობს.
ამის შესახებ აზერბაიჯანის პრეზიდენტმა ილჰამ ალიევმა 24 ოქტომბერს საქართველოს პრემიერ-მინისტრ ირაკლი ღარიბაშვილთან შეხვედრის შემდეგ ერთობლივი პრეს-განცხადების დროს განაცხადა.
„გვინდა გამოვიყენოთ ბაქო-სუფსას ტერმინალი, ვიცი რომ ის არ არის ამამად მოქმედი, მაგრამ გვინდა რომ დავტვირთოთ ეს მიმართულებაც“, — განაცხადა ალიევმა.
ბაქო-სუფსის მილსადენი, რომელიც საქართველოზე გამავალი ერთ-ერთი სტრატეგიული ობიექტია, მაისიდან მოყოლებული ნავთობს აღარ ატარებს.
აზერბაიჯანულმა მხარემ საქართველოს და შემდეგ შავი ზღვის გავლით ნავთობის გადაზიდვის შემცირების გადაწყვეტილება მარტში მიიღო, აპრილიდან კი ბაქო-სუფსის მილსადენის ოპერირება ფაქტობრივად შეჩერდა. სანაცვლოდ, ნედლი ნავთობი სრულად ბაქო-თბილისი-ჯეიჰანის მილსადენში გადამისამართდა, რომლის მეშვეობითაც ტანკერების შევსება ხმელთაშუაზღვის ჯეიჰანის პორტში ხდება.
თავად ბაქო-სუფსას მილსადენის სიგრძე 830 კილომეტრია და ის 1999 წელს ამოქმედდა. 2021 წელს მისი მეშვეობით 4.2 მილიონი ტონა ნედლი ნავთობის გადაზიდვა მოხდა. მილსადენის ოფიციალური სახელია WREP, ხოლო მას საერთაშორისო კომპანიებისგან შემდგარი კონსორციუმი ფლობს. ეს კომპანიებია - BP (30.4%); SOCAR (25%); MOL (9.6%); INPEX (9.3%); Equinor (7.3%); ExxonMobil (6.8%); TPAO (5.7%); ITOCHU (3.6%); ONGC Videsh Limited (2.31%).