იმედი მაქვს, სალომე ზურაბიშვილის განცხადებას მოჰყვება პრაქტიკული ნაბიჯები - „ლელო საქართველოსთვის“ ამ პროცესში, თუკი ის ინიცირებული იქნება ფორმალურად ზურაბიშვილის მხრიდან, მივიღებთ ძალიან აქტიურ მონაწილეობას,- ამის შესახებ „ლელოს“ ერთ-ერთმა ლიდერმა ბადრი ჯაფარიძემ განაცხადა, რითაც პოლარიზაციის შემცირებაზე ინკლუზიური პროცესის დაწყების თაობაზე პრეზიდენტ სალომე ზურაბიშვილის განცხადებას გამოეხმაურა.

ჯაფარიძე მიიჩნევს, რონ სწორი იქნება, თუ სალომე ზურაბიშვილი გაუკეთებს ორგანიზებას მრგვალ მაგიდას პოლიტიკური ძალების მონაწილეობით, რომლის საშუალებითაც უნდა მივიდნენ თანხმობის ფორმულამდე, რასაც უნდა მოჰყვეს შესაბამისი პოლიტიკური ნაბიჯები.

„სალომე ზურაბიშვილის ინიციატივა ძალიან მნიშვნელოვანია, პრეზიდენტს შეუძლია ითამაშოს გადამწყვეტი როლი, რომ ვითარების დეესკალაცია მოხდეს, გადავიდეთ ნორმალურ პოლიტიკური ცხოვრების რეჟიმში. იმედი მაქვს, მის განცხადებას მოჰყვება პრაქტიკული ნაბიჯები. ჩვენ „ლელო საქართველოსთვის“ ამ პროცესში, თუკი ის ინიცირებული იქნება ფორმალურად ზურაბიშვილის მხრიდან, მივიღებთ ძალიან აქტიურ მონაწილეობას. ეს არის გადაუდებელი აუცილებლობა, რომ მოვახერხოთ დაპირისპირებული პოლიტიკური ძალების ერთი მაგიდის ირგვლივ შეკრება. ქვეყნის ინტერესებიდან გამომდინარე უნდა მოხდეს შერიგების თუ შეთანხმების პროცესი, მე ვფიქრობ თანხმობის პროცესი ვიდრე შერიგების, ეს იქნება სწორი, რადგან არსებობს ქვეყნისთვის უმნიშვნელოვანესი პრიორიტეტები და გამოწვევები, რაზეც უნდა გავაკეთოთ კონცენტრირება და არა დაპირისპირებაზე და ზიზღზე“, - განაცხადა ჯაფარიძემ.

ცნობისთვის, საქართველოს პრეზიდენტის, სალომე ზურაბიშვილის განცხადებით, პირობას დებს, რომ წამოიწყებს ინკლუზიურ პროცესს, რათა „მივაღწიოთ უახლესი ისტორიის საერთო აღქმას, დავძლიოთ ტკივილი და წინ წავიდეთ“.

ipn.ge