5 ივლისის საღამოს, ბაგებში, „მეტრა პარკის“ არსებული საცხოვრებელი კომპლექსის მიმდებარედ, ამავე კომპანიის ახალი მშენებლობისთვის მოსამზადებელი სამუშაოებისას, კერძოდ, მთის ბორცვის მოხსნისას მასშტაბური მეწყერი ჩამოწვა. მეწყერმა მიწის ქვეშ მოიყოლა კომპანიის ქვეკონტრაქტორის კუთვნილი სამშენებლო ტექნიკა, გაარღვია არსებული კომპლექსისგან გამყოფი დამცავი თუნუქის შემოღობვა და სამანქანე და საფეხმავლო შიდა გზის ნაწილიც გარკვეულწილად დაფარა. საბედნიეროდ, შემთხვევისას არავინ დაზიანებულა.
მთის სოლიდური ნაწილის ჩამოშლამ გამოიწვია „მეტრა პარკის“ მეზობლად მდებარე მიწის 4 მესაკუთრის დაზარალება. მათი კუთვნილი მიწის ნაკვეთები უბრალოდ აღარ არსებობს – მეწყერმა ჩაიტანა. დაზარალებულები კომპანიის წინააღმდეგ საქმის წარმოებას გეგმავენ.
როგორც „მეტრა პარკის“ არსებული კომპლექსის მობინადრეები აცხადებენ, გუშინვე შემთხვევის ადგილზე იყვნენ ქალაქ თბილისის მუნიციპალიტეტის მერიის, წარმომადგენლები. ადგილზე მოვიდა ასევე სამაშველო სამსახურიც.
მათივე ინფორმაციით, პირველადი დათვალიერებით, ჩამოშლილია 40 000 კუბურ მეტრზე მეტი მიწა. მოხდარი შეფასდა, როგორც მასშტაბური ნგრევა. დაიგეგმა პირველადი სამუშაოები, რამაც მოსახლეობის შემდგომი უსაფრთხოება უნდა უზრუნველყოს.
მობინადრეები აცხადებენ, რომ რაც მოხდა, ეს მოსალოდნელი იყო, რამდენადაც „მეტრა დეველოპმენტი“ ახალი მრავალსართულიანი კომპლექსის აგებას გეგმავდა რეალურად შეუსწავლელი გეოლოგიის ფონზე და მეწყრული თვალსაზრისით სახიფათო ადგილზე.
სამშენებლო მოედანზე მეწყრული პროცესი პირველად არ განითარებულა. სამი თვის წინ, 2021 წლის აპრილში, ჩამოიშალა მთის მცირე მონაკვეთი. მოსახლეობა, ცალკე კომპანიას და ცალკე მერიის შესაბამის სამსახურებს, აფრთხილებდა, რომ ბზარები დღითი დღე იზრდებოდა და საშიშროება მატულობდა, თუმცა, საგნობრივი რეაგირება არც ერთი მხრიდან არ ყოფილა.
მოსალოდნელი საშიშროების შესახებ მეტრა პარკის არსებული კომპლექსის მოსახლეობას წინა წლებში არაერთი წერილი აქვს მიწერილი მერიისთვის, სადაც ითხოვდნენ კომპანიაზე მ მშენებლობის ნებართვის არ გაცემას. გაცემის შემდგომ, მის შეჩერებას. სასამართლო დავები, აღნიშნულ საკითხზე, დღესაც მიმდინარეობს.
კომპანიის წარმომადგენლები გუშინდელი შემთხვევის შემდეგ ადგილზე არ გამოჩენილან. დღეს კომპანიის საიტზე მითითებულ არც ადმინისტრაციისა და არც გაყიდვების ოფისის სატელეფონო ნომრებზე არავინ პაუხობდა.
ბოლო მონაცემებით, „მეტრა დეველოპმენტის“ დამფუძნებელი რუსეთის ფედერაციის მოქალაქე ორი ფიზიკური პირია.
წყარო: bfm.ge