გასული ზამთრის თითქმის ჩავარდნილი ტურისტული სეზონის შემდეგ 2021–2022 წლების სეზონზე მთის კურორტებზე მაღალი აქტივობა შეინიშნება. „კომერსანტს“ „ინნ ჯგუფის“ PR-ისა და მარკეტინგის ხელმძღვანელმა ლანა ბლიაძემ უთხრა, რომ როგორც “ბაკურიანი ინნ“ , ასევე “გუდაური ინნ“ სეზონზე სრული დატვირთვით მუშაობს. მან ასევე აღნიშნა, რომ “გუდაური ინნ“-ის დამსვენებლები ძირითადად უცხოელი ტურისტები არიან, ხოლო “ბაკურიანი ინნ“-ს უმეტესად ადგილობრივები სტუმრობენ.
„ბაკურიანი ინნ“ 5-ვარსკვლავიანი სასტუმროა, ხოლო „გუდაური ინნ“ 4-ვარსკვლავიანი, ორივეში იმდენად მაღალია აქტივობა, რომ უახლოესი პერიოდის განმავლობაში ფაქტობრივად ადგილები არ გვაქვს, “გუდაური ინნ“ მაქსიმალურად ტურისტებზეა გათვლილი, ჯერ კიდევ დიდი ხნის წინ ვიცოდით, რომ ეს პერიოდი იქნებოდა აბსოლუტურად შევსებული, რადგან საკმაოდ დიდი ჯგუფები იყო. გუდაურის სასტუმროში ძირითადად შემოდიან სლავები, პოლონელები, უკრაინელები და არაბები. რაც შეეხება „ბაკურიანი ინნ“-ს, ეს ქართველებზეა გათვლილი და აქაც დიდი აქტივობა გვაქვს, 4 იანვრიდან 12 იანვრამდე ფაქტობრივად ყოველ დღე 100% იანი აქტივობა იყო“, - აღნიშნა ლანა ბლიაძემ.
მისივე თქმით, „ინნ ჯგუფის“ არც ერთ სასტუმროში ვირუსის გავრცელება ამ სეზონზე არ დაფიქსირებულა, რაც გამკაცრებული რეგულაციების ზედმიწევნით დაცვის დამსახურებაა.
„საბედნიეროდ, კორონავირუსის გავრცელების ფაქტი ჩვენ სასტუმროში არ დაფიქსირებულა, ამას მივაწერ იმას, რომ წესებს მაქსიმალურად ვიცავთ, ძალიან მკაცრად კონტროლდება დერეფანში პირბადის ტარება. ჩვენთან კვება შვედური სუფრის პრინციპით არის და კვების დროს ყველა სტუმარს ერთჯერადი ხელთათმანების ტარებას ვთხოვთ, რაც გამორიცხავს იმ ფაქტს, რომ რომელიმე ადამიანის ხელის მოკიდებულზე მოუწიოს სხვას ხელის მოკიდება, რაც ინფექციის გავრცელების რისკს კიდევ უფრო ამცირებს.
რეგულაციების მიხედვით მოიხსნა, თუმცა საკმაოდ დიდ ხანს
გვქონდა რეგულაცია აუზზე, რომლის თანახმად 15 კაცზე მეტს არ ვუშვებდით. შესაბამისად, გვიწევდა, რომ თითოეულ მომხმარებელს დღეში მხოლოდ ერთ საათი გაეტარებინა აუზზე, რომ მთელ სასტუმროს მოესწრო აუზით სარგებლობა. მართალია ამან მომხმარებლის მხრიდან
კრიტიკა გამოიწვია, თუმცა შედეგად მივიღეთ ის, რომ ჩვენ სასტუმროებში ვირუსი არ დაფიქსირებულა“, - აღნიშნა ლანა ბლიაძემ.
ლანა ბლიაძემ „კომერსანტთან“ კომპანიის საფასო პოლიტიკაზეც ისაუბრა და აღნიშნა, რომ პანდემიის დასაწყისში “ინნ ჯგუფი“ ცდილობდა, ფასები მაქსიმალურად ხელმისაწვდომი ყოფილიყო და მეტ ქართველს შესძლებოდა მთაში დასვენება.
„როდესაც პანდემია დაიწყო, ჩვენი საფასო პოლიტიკა იყო ასეთი — ყველას უნდა შესძლებოდა, რომ მთაში წასულიყო, დავაწესეთ უპრეცედენტოდ ხელმისაწვდომი ფასები, გვინდოდა რომ ყველა წასულიყო თბილისიდან, რადგან თბილისი იყო ეპიცენტრი და ჩვენი მხრიდან ეს იყო ერთგვარი სოციალური პასუხისმგებლობა, რომ ჩვენი მომხმარებლისთვის მაქსიმალურად დაბალი ფასი დაგვეწესებინა და “ბაკურიანი ინნ“ და „გუდაური ინნ“ ყოფილიყო ყველასთვის და არა 5 - 6 კაცისთვის. ახლა უკვე 2022 წელს ბაზარმა მოგვცა იმის შესაძლებლობა, რომ 5-ვარსკვლავიანი სასტუმროს ფასი დაგვეწესებინა, მაგრამ ვერ გეტყვით რომ ამის გამო აქტივობამ დაიწია“, - აღნიშნა ლანა ბლიაძემ.
ამ ეტაპზე „ინნ ჯგუფის“ სასტუმროებში სამჯერადი კვებით სტანდარტული ნომრის ფასი უკანა ხედით 435 ლარს შეადგენს, ხოლო წინა ხედით 465 ლარს.
თაკო კვაჭანტირაძე