საქართველოში მოქმედი ბანკებისთვის უცხოური ვალუტით მოზიდულ სახსრებზე მინიმალური სარეზერვო მოთხოვნა შესაძლოა გაიზარდოს. ამის შესახებ მარტში საქართველოს ეროვნული ბანკის პრეზიდენტმა კობა გვენეტაძემ დაანონსა.
„ინფლაცია გლობალური პრობლემაა და ასევე დგას საკითხი საქართველოში. ჩვენ ვაანალიზებთ იმ ფაქტორებს, რომლებიც ინფლაციის ზრდის უკანაა. აქედან გამომდინარე, ყველა ის მაჩვენებელი, რომელიც გვაქვს, ყველა მიმდინარეობა, ყურადღების ქვეშაა.
არის სიტუაცია, როდესაც სხვადასხვა მიზეზების გამო და დღევანდელ ვითარებაში ეს გახლავთ მაღალი დოლარიზაცია, მონეტარული პოლიტიკის განაკვეთმა შეიძლება ვერ შეასრულოს თავისი როლი და აქედან გამომდინარე, სხვადასხვა ზომების მიღება გახდეს საჭირო. ეს არ იქნება უნიკალური საქართველოს ეროვნული ბანკისთვის. ბევრი ბანკი აკეთებს ამას. რა გადაწყვეტილების მიღება მოხდება, დამოკიდებულია იმაზე, თუ რა მიმდინარეობა და როგორი ანალიზის შედეგი გვექნება“, - განაცხადა კობა გვენეტაძემ.
საბანკო ასოციაციის ხელმძღვანელი ალექსანდრე ძნელაძე იმედოვნებს, რომ სარეზერვო მოთხოვნის გაზრდა საჭირო არ გახდება, რადგან ეს კომერციული ბანკებისთვის რთული იქნება.
„წინა კომიტეტის სხდომაზე გადაწყვეტილების დროს მინიმალური სარეზერვო ნორმა არ გაიზარდა და ვიმედოვნებთ, რომ ეს არც მომავალში მოხდება. შემდეგი სხდომა აგვისტოშია დაგეგმილი და იმედია არ მოხდება იქ განხილვა. ეს ძალიან მტკივნეული და რთული იქნება ბანკებისთვის, რადგან ეს არამხოლოდ ახალ არამედ უკვე არსებულ დეპოზიტებსაც შეეხება, რომელიც უკვე განთავსებულია ბანკებში. ცნობილია რომ დეპოზიტების პორტფელი საკმაოდ მაღალი დოლარიზაციით ხასიათდება და ეს სიახლე მნიშვნელოვნად გაზრდის ბანკის ხარჯს. ეს გადაწყვეტილება აძვირებს მოზიდულ სახსრებს არამხოლოდ მომავალში, არამედ არსებულ მოზიდულ სახსრებზეც, ეს რთულია, განსაკუთრებით მაშინ როდესაც დღეს აქტივობა არ არის 2021 წლის მაჩვენებლებზე მაღალი“, - განაცხადა ალექსანდრე ძნელაძემ.
კომერციული ბანკებისთვის 2021 წლიდან სავალუტო სახსრების დარეზერვების ახალი წესი ამოქმედდა. კერძოდ, სარეზერვო მოთხოვნა 10%-დან 25%-მდეა და თითოეული ბანკისთვის ის ამ ბანკის დეპოზიტების დოლარიზაციაზეა დამოკიდებული.
საბანკო ასოციაცია
