საქართველოს ბანკებში არსებული დეპოზიტები 15 000 ლარამდე მოცულობით დეპოზიტების დაზღვევის სააგენტოს მიერ არის დაზღვეული. ამისთვის ქვეყანაში მოქმედი კომერციული ბანკები სააგენტოს ყოველთვიურად სპეციალურ სადაზღვევო პრემიას უხდიან. ამ შენატანების ზომამ იანვარში 3.337 მილიონი ლარი შეადგინა. 

„დეპოზიტების დაზღვევის სისტემის შესახებ“ საქართველოს კანონის და „კომერციული ბანკების მიერ გადასახდელი რეგულარული სადაზღვევო შენატანების ბაზის დაანგარიშების და რეგულარული სადაზღვევო შენატანის გადახდის პროცედურების შესახებ” ინსტრუქციის შესაბამისად, საქართველოში მოქმედი კომერციული ბანკებისთვის 2023 წლის იანვრის თვის რეგულარული სადაზღვევო შენატანის ჯამურმა ოდენობამ 3,337,504.20 ლარი შეადგინა, რომელიც ბანკებმა 2023 წლის თებერვალში დაფარეს“, -აღნიშნავენ საქართველოს დეპოზიტების დაზღვევის სააგენტოში.

2024 წლის პირველი იანვრიდან დაზღვეული დეპოზიტის ანაზღაურებადი თანხის ოდენობა 30 000 ლარამდე გაიზრდება. დეპოზიტების დაზღვევის ზღვართან დაკავშირებით ცვლილება ერთხელ უკვე განხორციელდა, 2020 წლის 1-ლი ივლისიდან დაზღვეული დეპოზიტების ზღვარი 15 000 ლარამდე გაიზარდა. ამასთან, 2022 წლის პირველი იანვრიდან, დეპოზიტების დაზღვევის სისტემა იურიდიულ პირებზეც გავრცელდა. მანამდე კი მხოლოდ ფიზიკური პირების დეპოზიტები იყო დაზღვეული. დეპოზიტების დაზღვევის სისტემა საქართველოში 2018 წლის 1 იანვრიდან მოქმედებს.