SOCAR-ის პრეზიდენტმა როვშან ნაჯაფიმ აშხაბადში გამართულ 27-ე საერთაშორისო გამოფენასა და კონფერენციაზე - „თურქმენეთის ნავთობი და გაზი 2022“ განაცხადა, რომ ბაქო-თბილისი-ჯეიჰანის მილსადენით მსოფლიო ბაზრებზე თურქმენული ნავთობის ექსპორტის მოცულობა ამ დროისთვის 32 მილიონი ტონაა.
მისი თქმით, აზერბაიჯანსა და თურქმენეთს შორის ხელმოწერილი ურთიერთგაგების მემორანდუმი ნავთობისა და გაზის საბადო „დოსტლუგზე“ ერთობლივი კვლევის, განვითარებისა და ნახშირწყალბადების რესურსების ექსპლუატაციის შესახებ ორივე ქვეყანას ახალ შესაძლებლობებს უქმნის. SOCAR-ის პრეზიდენტმა ასევე აღნიშნა, რომ სამხრეთ გაზის დერეფანს დიდი მნიშვნელობა აქვს არა მხოლოდ აზერბაიჯანისთვის, არამედ რეგიონის ქვეყნებისთვისაც.
პროექტის მონაწილეები არიან: BP (30.1%), SOCAR (25%), MOL (8,9%), Equinor (8,71%), TPAO (6,53%), ENI (5%), ITOCHU, (3,4%); ExxonMobil (2,5%), INPEX (2.5%), TotalEnergies (5%) და ONGC (2.36%).
ბაქო-თბილისი-ჯეიჰანის ნავთობსადენის სიგრძე 1768 კმ-ია, აქედან 443 კმ აზერბაიჯანის ტერიტორიაზე გადის, 249 - საქართველოში და 1076 - თურქეთში. მილსადენის გამტარუნარიანობა წელიწადში 50 მილიონ ტონას აღემატება.
2021 წელს ნავთობსადენით გატარებული ნავთობის მოცულობა 26 მლნ 421,5 ათასი ტონა იყო, რაც 3,9%-ით ნაკლებია 2020 წელთან შედარებით. 2022 წლის 9 თვის მონაცემებით ბაქო-თბილისი-ჯეიჰანის მილსადენით გატარებული ნავთობის მოცულობა 21 მლნ 688,4 ათასი ტონაა. ეს კი 10,8%-იან ზრდას ნიშნავს.
2021 წლის 21 იანვარს აზერბაიჯანმა და თურქმენეთმა ხელი მოაწერეს ურთიერთგაგების მემორანდუმს კასპიის ზღვაში „დოსტლუგის“ ნახშირწყალბადის საბადოს ერთობლივი გამოკვლევისა და განვითარების შესახებ. აზერბაიჯანის პარლამენტმა მემორანდუმი 2021 წლის თებერვალში დაამტკიცა. თურქმენეთის მეჯლისმა დოკუმენტი მიმდინარე წლის მარტში დაამტკიცა. ექსპერტების აზრით, „დოსტლუგის“ მარაგი დაახლოებით 60 მილიონი ტონა ნავთობი და 100 მილიარდი კუბური მეტრი გაზია.
მოამზადა მაკა ბიბილაშვილმა