ბრიტანული მოდის წამყვანმა ბრენდმა Burberry-მ 2020 წელი საქართველოში ზარალით დაასრულა. „ბარბერი საქართველომ“ (შპს ლიდერ სისტემა) პანდემიურ წელთ 3 092 644 ლარი იზარალა. მაშინ, როცა კომპანიამ 2019 წელს 870 530 ლარის მოგება მიიღო.
2020 წელს, 2019 წელთან შედარებით, კომპანიის შემოსავალი მნიშვნელოვნადბ 6 429 812 ლარით (–38,7%) – 7 673 679 ლარამდე შემცირდა. საანგარიშო პერიოდში კომპანიის საკუთრებაში 3,7 მლნ ლარის აქტივები იყო.
შპს „ლიდერ სისტემი“ ბრიტანული კომპანია Burberry Limited-გან ფლობს საქართველოს ტერიტორიაზე Burberry-ის ბრენდის ექსკლუზიური წარმომადგენლობის უფლებას, რაც გულისხმობს არამხოლოდ Burberry-ის ბრენდული მაღაზიების ფლობისა და ოპერირების, არამედ, კომპანია Burberry-ის სახელის, ლოგოტიპისა და სხვა სავაჭრო ნიშნების გამოყენების უფლებას.
როგორც ირკვევა, კომპანიის პროდუქციის ძირითადი ნაწილი თბილისში იყიდება. მომზადებულ დოკუმენტში ვკითხულობთ, რომ 2018-2019 წლებში განხორციელდა ხარჯების ოპტიმიზაციის პროგრამა და 2019 წელს დაფიქსირდა - 870 531 ლარი მოგება, თუმცა მათი ინფორმაციით, 2020 წელს პანდემიამ და სავალუტო კურსის რყევამ კომპანიას უდიდესი ფინანსური ზარალი მიაყენა. ამის საერთო შედეგიც ფინანსურ ანგარიშგებაში 3 092 644 ლარის ზარალით გამოისახა.
Burberry-ის მაღაზია თავისუფლების მოედანზე, თბილისის საკრებულოს შენობის პირველ სართულზეა განთავსებული. კომპანიამ იჯარაში 2020 წელს 475 655 ლარი გადაიხადა. ეს თანხა 2019 წელს 586 484 ლარი იყო. ადმინისტრაციულმა და სხვა საოპერაციო ხარჯებმა 2 875 679 ლარი შეადგინა, ხოლო თანამშრომელთა ხელფასებში კომპანიამ 760 164 ლარი დახარჯა.
კომპანიაში ფიქრობენ, რომ არსებული სიტუაციის გათვალისწინებით, დამფუძნებელთა მიერ განხორციელებული 1 559 429 ლარის კაპიტალიზაციის მიუხედავად, კომპანიას ფუნქციონირება გაუჭირდება. თუმცა, დოკუმენტში წერია ისიც, რომ დამფუძნებლის დამატებითი შენატანები კომპანიას შეუნარჩუნებს ფინანსურ სტაბილურობას, რათა გააგრძელონ განვითარება.
საწარმოს 2020 წლის 31 დეკემბრის მდგომარეობით გააჩნდა გრძელვადიანი ფინანსური ვალდებულება. კერძოდ, დამფუძნებლის ჰაიკ ხაჩატრიანის სესხი – 3 150 021 ლარი, ხოლო, სხვადასხვა იურიდიული და ფიზიკური პირების მიმართ არსებული სესხი საერთო ჯამში – 7 028 886 ლარის ოდენობით.
შპს ,,ლიდერ სისტემი“ საქართველოში 2011 წლიდან ოპერირებს. კომპანიის დამფუძნებელი და 100% წილის მფლობელია სომხეთის მოქალაქე ჰაიკ ხაჩატრიანი. კომპანიის ძირითად საქმიანობას წარმოადგენს სამშენებლო მასალებით, ფეხსაცმლით, ჩანთებითა და ტანსაცმლით საცალო ვაჭრობა.
„ლიდერ სისტემისგან“ რადიკალურად განსხვავებულია ბრიტანული მოდის წამყვანი ბრენდის ოფიციალური ფინანსური მაჩვენებელი. Burberry-ის შემოსავალი 2020 წელს 2,63 მლრდ ფუნტი სტერლინგი იყო.
ბაჩო ადამია