ბათუმის სამრეწველო ზონა გაფართოებას აგრძელებს. ამ მიზნით აჭარის ფინანსთა და ეკონომიკის სამინისტრომ აუქციონზე ბათუმში, ჭოროხის ქუჩის მიმდებარედ, აჭარის ავტონომიური რესპუბლიკის საკუთრებად რეგისტრირებული 10 673 კვ.მ არასასოფლო-სამეურნეო დანიშნულების მიწის ნაკვეთი განმეორებით, პირობებიან ელექტრონულ აუქციონზე გამოიტანა.
ობიექტის საწყისი ღირებულება 1 100 000 ლარია.
საპრივატიზაციო პირობების თანახმად, გამარჯვებულმა ხელშეკრულების გაფორმებიდან 12 თვის ვადაში ქალაქ ბათუმის მუნიციპალიტეტის საკრებულოს მიერ დადგენილი „საწარმოო ზონის“ შესაბამისი საწარმოს/წარმოების ხაზის ან/და დახურული ტიპის სასაწყობე მეურნეობის (გარდა ინერტული მასალების წარმოებისა) მშენებლობის ნებართვის მიღება უნდა უზრუნველყოს.
იმავდროულად, აუქციონში გამარჯვებული პირი ვალდებულია ხელშეკრულების გაფორმებიდან 42 თვის ვადაში, საკუთრებაში გადაცემულ ქონებაზე შესაბამისი მშენებლობის ნებართვის მიხედვით საწარმოსათვის განკუთვნილი შენობანაგებობ(ებ)ის ექსპლუატაციაში გადაცემა განახორციელოს.
ხოლო ხელშეკრულების გაფორმებიდან 48 თვის ვადაში საკუთრებაში გადაცემულ ქონებაზე, საწარმოს/წარმოების ხაზის ან/და დახურული ტიპის სასაწყობე მეურნეობის (გარდა ინერტული მასალების წარმოებისა), ამოქმედება, სადაც დასაქმებულთა არანაკლებ 90% უნდა შეადგენდეს საქართველოს მოქალაქეებს; დასაქმებულთა თანაფარდობის და საწარმოს პროფილის შენარჩუნება ობიექტის ამოქმედებიდან არანაკლებ 15 წლის განმავლობაში;
აუქციონში გამარჯვებული ვალდებულია, პროექტში (საწარმოსა და საწარმოო ხაზის მშენებლობისათვის, ძირითადი საშუალებების შეძენისათვის, წარმოების ხაზის ფუნქციონირებისათვის, მათ შორის დახურული სასაწყობე მეურნეობისათვის) არაუგვიანეს 48 თვის ვადაში არანაკლებ 700 000 ლარის ინვესტიციის განხორციელება უზრუნველყოს.
აღნიშნული ლოტის გასასხვისებლად აუქციონი 15 თებერვლისთვისაა ჩანიშნული.