„უძრავი ქონების ფასი პროგრესულად იზრდება მათ შორის ბათუმშიც, რასაც სამი ფაქტორი განაპირობებს. ესენია: მოთხოვნის ზრდა, ინფლაცია და რეგულაციები“ - ამის შესახებ „კომერსანტს“ „მარდი ჰოლდინგის“ აღმასრულებელმა დირექტორმა ნათია სირაბიძემ უთხრა. მისი თქმით, ბინებზე მოთხოვნის ზრდამ ერთგვარი პანიკაც გამოიწვია იმაზე, რომ შესაძლოა ბინებზე დეფიციტი შეიქმნას.
„პირველი ფაქტორი ეს არის მოთხოვნის ზრდა, რამაც ერთგვარი პანიკა შექმნა და გაჩნდა მოლოდინი, რომ შესაძლოა ბინებზე დეფიციტი შეიქმნას, მაგალითად მცირე ზომის ბინებზე მოთხოვნა ძალიან დიდია, ხოლო მიწოდება ნაკლები. შეიძლება ითქვას, რომ ბათუმში ერთოთახიან ან სტუდიოს ტიპის ბინას ვერ იშოვი, ძალიან რთული საპოვნელია.
მეორე ფაქტორი მსოფლიოს მასშტაბით არსებული ინფლაციაა, ამან ჩვენზეც იმოქმედა, ეროვნული ვალუტა გაუფასურდა და შესაბამისად ყველაფრის ფასები გაზარდა.
მესამე ფაქტორი კი რეგულაციების გამკაცრებაა, იმდენად გამკაცრებულია რეგულაციები, რომ თითზე ჩამოსათვლელია პროექტები, რომლებზეც გასულ წელს ნებართვა გაიცა. დეველოპერები და მშენებლები ძირითადად ადრე დამტკიცებულ პროექტებზე მუშაობენ და ცდილობენ ძველი პროექტი მოიპოვონ და აშენონ, რომელსაც ეს ახალი რეგულაციები არ ეხება, რეგულაციებში იგულისხმება სიმაღლე, k2 კოეფიციენტი, რომლის გადათვლა ახლა სხვანაირად ხდება და დეველოპერებისთვის მომგებიანი აღარ არის,“ - აღნიშნა ნათია სირაბიძემ.
კომპანია Noble Reale Estate-ის დამფუძნებელი ვაჟა მებაღიშვილი ამბობს, რომ საქართველოში განსაკუთრებით თბილისსა და დიდ ქალაქებში უძრავი ქონება ძალიან არის გაძვირებული, რისი მიზეზიც მაღალი მოთხოვნა და სამშენებლო მასალების გაძვირებაა.
„საერთო ფონი არის ის, რომ უძრავი ქონება საქართველოში, განსაკუთრებით კი თბილისსა და დიდ ქალაქებში ძალიან არის გაძვირებული. უძრავ ქონებაზე მოთხოვნა ძალიან გაზრდილია, თუმცა სამწუხაროდ მიწოდების ნაწილში ვერ ვართ ისე, როგორც უნდა ვიყოთ. გაძვირების ძირითადი განმსაზღვრელ ფაქტორები არის სამშენებლო მასალების სიძვირე და მოთხოვნა. სამშენებლო კომპანიების მშენებლობა ძალიან ძვირი უჯდებათ, ამან განაპირობა ბინებზე ფასის ზრდაც“, - აღნიშნა ვაჟა მებაღიშვილმა.
2023 წლის იანვარში ბათუმში ბინების გაყიდვების მაჩვენებელი გასული წლის იანვართან შედარებით 75%-ით, 1,330 ერთეულამდე გაიზარდა, ბაზრის ზომა კი 98%-ით გაიზარდა და 58 მილიონი აშშ დოლარი შეადგინა. უძრავი ქონების ბაზარზე საცხოვრებელი ბინების გაყიდვების განახლებულ მიმოხილვას Colliers Georgia სპეციალურ ვებგვერდ recov.ge-ზე აქვეყნებს.
ამ მონაცემების მიხედვით, ბათუმში აღნიშნულ პერიოდში ახალაშენებული ბინების საშუალო შეწონილი ფასი 34%-ით გაიზარდა და კვ.მ-ზე 924 დოლარი შეადგინა. ძველი ბინების შემთხვევაში კი მაჩვენებელი 6%-ით, 674 დოლარამდე გაიზარდა.
ბათუმში იანვარში ახალაშენებული ბინების ტრანზაქციების რაოდენობა 76%-ით გაიზარდა, ძველი ბინების შემთხვევაში კი 72%-იანი ზრდა დაფიქსირდა. იანვარში ყველაზე მაღალი მოთხოვნა ახალაშენებულ პრემიუმ სეგმენტის ბინებზე იყო, მოთხოვნის ზრდამ ამ შემთხვევაში 339% შეადგინა. ეკონომ და მედიუმ სეგმენტებში კი მოთხოვნის 39% და 68%-იანი ზრდა დაფიქსირდა, რამაც 579 და 296 ერთეული შეადგინა.
თაკო კვაჭანტირაძე