ინფლაციის, ენერგომატარებლებსა და პროდუქტებზე გაზრდილი ფასის გამო ბავშვთა გასართობი ცენტრები ახალ სეზონს 15-20%-ით გაზრდილი ფასებით შეხვდნენ. როგორც „კომერსანტთან“ გასართობი ცენტრების ასოციაციის ხელმძღვანელი გიორგი მთიულიშვილი ამბობს გაზრდილი ფასის მიუხედავად გასართობი ცენტრების მიმართ მიმართვიანობა მაინც მაღალია.
„როგორც მომართვიანობა, ასევე ობიექტების დამატების კუთხით კარგი ტენდენცია შეინიშნება, რაც რა თქმა უნდა ძალიან მისასალმებელია. ზაფხულის პერიოდის მერე ჩვენი სეზონი ახლა იწყება და მომართვიანობა საკმაოდ ნორმალურია ამ ეტაპისთვის და ამას ისედაც ველოდით, მონატრებული კონტინგენტი დაუბრუნდა სექტორს.
რაც შეეხება ფასებს, ჩვენ მომსახურებაზე ფასების ზრდა პანდემიის შემდეგაც მოგვიწია, ასევე გავზარდეთ ფასები წინა სეზონთან შედარებითაც, რომელიც ივლისში დასრულდა. ფასის გაზრდა მოგვიწია, რადგან გაზი გაძვირდა, პროდუქცია გაძვირდა, საწვავზე გაგვიხარდა ფასის კლება, თუმცა შემდეგ ისევ გაძვირდა. შესაბამისად ფასის დაჭერა დაახლოებით ერთი წელია ვეღარ ხდება. ეს ყველაფერი კი მომხმარებელზე აისახება ცუდად, გუშინ რომ რაღაც ფიქსირებული 1 ლარი ღირდა და დღეს ეუბნები, რომ 1,20 ლარი გახდა. რთულია გააგებინო, რომ ფქვილი, ყველი და კვერცხის ფასი გაგიძვირდა, ეს ყველაფერი ძალიან დიდი დისკომფორტია“, — განაცხადა გიორგი მთიულიშვილმა.
როგორც მთიულიშვილმა აღნიშნა, მიმდინარე წელს სექტორს 5 ახალი ობიექტი დაემატა, თუმცა მისივე თქმით ახალი ობიექტების დამატება კი კარგია, მაგრამ ასევე დიდი რისკია ისედაც გაუბედურებულ სფეროში თანხის ჩადება.
გასართობი ცენტრების ასოციაციის ხელმძღვანელმა „კომერსანტთან“ კადრების დეფიციტზეც ისაუბრა და განმარტა, რომ ყველაზე დიდი პრობლემა რაც სექტორს პანდემიის შემდეგ შეექმნა კადრების დეფიციტია.
„როგორც ყველა სხვა ბიზნეს სფეროში, ჩვენთანაც შეიქმნა კადრების დეფიციტი, თუმცა არც ისე დაბალ ხელფასებს ვთავაზობთ, ჩვენ სექტორში ხელფასი დაახლოებით 700-800 ლარია, რაც გასართობი ცენტრისთვის დაბალი არ არის. პანდემიის დროს პროფესია შეიცვალეს და იქ დარჩნენ, ამას დაემატა ქვეყნიდან გადინებაც. ასევე ჩემი სუბიექტური აზრია, რომ სოც დაუცველების მიმართ არასწორი პოლიტიკაა, რადგან როდესაც ამდენი სოც დაუცველია ქვეყანაში და მათგან 70% ჩვენ ხარჯზეა არასწორია, მათაც ურჩევნიათ რომ სახლში იყვნენ აიღონ სამასი ლარი ვიდრე, იმუშაონ და ჰქონდეთ 600 ლარი, არადა ამდენი მუშა- ხელი რომ გაჩნდეს ყველა სექტორისთვის კარგი იქნება“, - აღნიშნა გიორგი მთიულიშვილმა.
თაკო კვაჭანტირაძე