„114-ზე დავრეკეთ, რომ ჭორებზე არ ვყოფილიყავით დამოკიდებული და გვითხრეს რომ არ გვაქვს მუშაობის უფლება.  6 ეტაპიდან ვერც ერთში გასართობი ცენტრები ვერ მოხვდა,“- ამის შესახებ „კომერსანტს“ გასართობი ცენტრის „დეჯავინოს“ მარკეტინგის განყოფილების ხელმძღვანელმა ნინო ღვალაძემ განუცხადა.

როგორც ცნობილია, ბავშვთა გასართობი და წვეულების ცენტრებისთვის ჯერჯერობით რეგულაცია არ შემუშავებულა და არც სავარაუდო გახსნის თარიღია ცნობილი. ამ ეტაპზე, ანიმატორებისთვის მხოლოდ ღია სივრცეში გამოძახებებზე გასვლა 13 ივლისიდანაა ნებადართული.  პანდემიის პირობებში, თვეობით გაჩერებული ბიზნესი მთავრობის გადაწყვეტილებას ელოდება. როგორც „დეჟავინოში“ განგვიმარტეს წვეულებების სფერო მძიმე მდგომარეობაშია, თუმცა სექტემბრიდან იმედს გამოთქვამენ, რომ ბიზნესს მუშაობის უფლება ექნება.

„ამ ეტაპზე მთლიანად გაჩერებული ვართ , გამოძახების სერვისის ამუშავების უფლება არ დაგვრთეს.  შიგნით ცენტრებში კი ვერ ვმუშაობთ. ჯერჯერობით რამე რეგულაციაზე ინფორმაცია არ გვაქვს.  თუმცა, მზად ვართ ყველანაირად. ძალიან რთულ მდგომარეობაშია ჩვენი მიმართულება, ისიც არ ვიცით სკოლაც, რომ დაიწყოს როგორ ვიმუშავებთ, რადგან ჩვენ ძირითადად სკოლებში გვაქვს გამოძახებები. ეს გამოძახებებიც მიზერული იქნება და არ ვიცით რა დაემუქრება ჩვენს ბიზნესს.

ყველაფერი შევიძინეთ, დეზობარიერებიც, სადეზინფექციო სითხეებიც, ჩვენ ამ პრინციპით უკვე 5 წელია ვმუშაობთ. ერთადერთი, ვფიქრობდით, რომ ბატუტების, აუზის ბურთების, სასრიალოების გამოყენების უფლებას არ მოგვცემდნენ. მაგრამ, ჯერ არავის უთქვამს როგორ უნდა გავაგრძელოთ მუშაობა, როგორი იქნება დისტანცია, ბავშვების მაგიდები როგორ უნდა განლაგდეს, მშობლები სად უნდა ისხდნენ - სრულ გაურკვევლობაში ვართ,“ - განმარტავს ნინო ღვალაძე.

ბავშვთა გასართობი ცენტრები ამჟამად შემოდგომის სეზონის მოლოდინში არიან, თუმცა ბიზნესისთვის მიყენებული ზარალი მძიმე აღმოჩნდა.  რასაც მოწმობს გასართობ ცენტრ „მინიონების“ მდგომარეობა, რომელიც იძულებული გახდა კრიზისის გამო ფილიალი ბანკისთვის გადაეცა.

მარიამ მორგოშია