რუსეთის მიერ დაწყებული ომისა და აგრესორის მიმართ დაწესებული სანქციების გამო მსოფლიო ეკონომიკა ახალი გამოწვევების წინაშეა. მათ შორის საქართველოც, რომელსაც უკვე აქვს პრობლემა როგორც სავალუტო ბაზარზე, ასევე სავაჭრო ურთიერთობებში. ასეთ პირობებში განსაკუთრებით აქტუალურია საკითხი, რომელი ქვეყნები ჩაანაცვლებენ რუსეთს და რეალურად რა შესაძლებლობა აქვს  საქართველოს გარდამტეხი ცვლილებისთვის. როგორც სტატისტიკოსი სოსო არჩვაძე აცხადებს, ბაზარი არსებითად უნდა გადაეწყოს, განსაკუთრებით  სტრატეგიულ მარაგებთან  დაკავშირებით.

,,ჩვენ იმდენად ღირებულებითი ფორმით არ გვაქვს პრობლემა, ვიდრე  დეტონატორის მიხედვით, ცალკეული პროდუქციის იმპორტში ძალიან ვართ რუსულ ბაზარზე დამოკიდებული, როგორიცაა მარცვლეული. ამიტომ საჭიროა ამ მიმართულებით გადაკვალიფიცირება და გარკვეული სტრატეგიული რეზერვების შექმნა, რომ ერთ ქვეყანაზე არ ვიყოთ მიბმული. ვაჭრობა იქნება თუ რომელიმე სხვა ტიპის ეკონომიკური აქტივობა, როცა გარკვეულ  სუბიექტზე ხარ დამოკიდებული, უსაფრთხოებას სერიოზული პრობლემა ექმნება. მარცვლეულის კომპონენტში კი რუსეთზე დამოკიდებულება 95%-ია, ამიტომ რისკები გაცილებით მაღალია. როდესაც რომელიმე საქონლის იმპორტში კონკრეტული ქვეყანა მესამედს გადააჭარბებს, წითელი უნდა ინთებოდეს და სახელმწიფო საფრთხის მომხსნელ, გამანეიტრალებელ  ზომებს ატარებდეს“, - აცხადებს სოსო არჩვაძე.

რაც შეეხება ალტერნატივას, სტატისტიკოსის მოსაზრებით, ეს უნდა იყოს ევროპული ქვეყნები, აშშ და სხვა სახელმწიფოები, საითაც ბაზარს უნდა ჰქონდეს სწორება, როცა საქმე სტრატეგიულ მარაგებს ეხება.

,,ალტერნატივა, რა თქმა უნდა, არის. ჩვენ შეგვიძლია სხვა ბაზრებიდან მოვიძიოთ მარცვლეული, როგორიცაა კანადა, აშშ, ავსტრალია, არგენტინა და სხვა. ბოლო დრომდე ჩვენ ვამჯობინებდით იაფი მეზობელი ქვეყნიდან შემოსული ხორბლის გამოყენებას, მაგრამ. ქართული საზოგადოება უნდა შეეგუოს აზრს, ერთ კონკრეტულ ბაზარზე ვერ ვიქნებით დამოკიდებული. პური შეიძლება გაძვირდეს, მაგრამ მის ღირებულებაში ჩადებული იქნება თავისუფლებისა და იმ დამოუკიდებლობის ფასი, რასაც ქვეყანა უნდა იხდიდეს რუსეთზე დამოკიდებულების შესამცირებლად. ამას თუ შევძლებთ, გვექნება შესაძლებლობა, რესურსები უფრო რაციონალურად გამოვიყენოთ, მეტად მოვახდინოთ მობილიზება მაღალი ღირებულების პროდუქტის წარმოებაზე და შევძლოთ შედარებით ძვირადღირებული მარცვლეულის იმპორტით გადაფარვა“, - აცხადებს არჩვაძე ,,კომერსანტთან“.

სტატისტიკოსის შეფასებით, ამ ეტაპზე, როდესაც რუსეთი დეფოლტის წინაშეა, დაზარალდება საქართველოც.  ყველაზე მეტად კი ლარს ემუქრება საფრთხე გაუფასურებული რუსული რუბლის შემოდინების გამო. ასეთ სიტუაციაში სოსო არჩვაძე ეროვნულ ბანკს და მთავრობას მოუწოდებს, ზომები გაამკაცრონ და ახალი რეგულაციები დაწესდეს, რაც ერთ-ერთი შესაძლებლობაა რუსეთის დეფოლტის შესაძლო გავლენის შესამცირებლად.

მარი ჩიტაია