ფიზიკური პირები, რომლებიც ბაზრობების ტერიტორიაზე მუშაობენ, სალარო-აპარატების გამოყენებისგან 2023 წლამდე გათავისუფლდებიან. დარგობრივი ეკონომიკისა და ეკონომიკური პოლიტიკის კომიტეტმა ქართული ოცნების დეპუტატების საკანონმდებლო ინიციატივას მხარი უკვე დაუჭირა. საგადასახადო კოდექსში 2019 წელს განხორციელებული ცვლილებების შედეგად, 2022 წლის 1-ლი იანვრიდან ბაზრობის ტერიტორიაზე მოვაჭრეებს სალარო აპარატი უნდა გამოეყენებინათ, თუმცა მათ კიდევ ერთი წელი მიეცემათ რომ სამუშაო ადგილების დაკარგვის გარეშე შეხვდნენ საგადასახადო კოდექსის ახალ მოთხოვნებს.
პარლამენტის წევრის ეკა სეფაშვილის განცხადებით, ცვლილებები კორონავირუსით გამოწვეული პანდემიითა განპირობებული. დარგობრივი ეკონომიკისა და ეკონომიკური პოლიტიკის კომიტეტის თავმჯდომარის პირველმა მოადგილემ თქვა, რომ განსაკუთრებული დარტყმის ქვეშ მცირე და საშუალო ბიზნესი აღმოჩნდა.
„საგადასახადო კოდექსში ცვლილება ითვალისწინებს ბაზრობის ტერიტორიაზე განლაგებული სავაჭრო ადგილების საკონტროლო სალარო აპარატებით აღჭურვის ვალდებულების გადატანას 2023 წლის პირველ იანვრამდე. ამჟამად კანონში არსებული ჩანაწერის მიხედვით, რომელიც 2019 წლის 19 დეკემბერს შევიდა ძალაში, ეს ვალდებულება უნდა განხორციელებულიყო 2022 წლის 1-ლი იანვრისთვის. იქიდან გამომდინარე, რომ ქვეყანაში პანდემიის შედეგად მთელი რიგი ცვლილებები იქნა გამოწვეული ეკონომიკური საქმიანობის კუთხით, დიდი დარტყმა მცირე და საშუალო ბიზნეს მიადგა განსაკუთრებით მცირე, მიკრო ვაჭრობის სფეროში ჩაბმულ მოვაჭრეებს, ეს მათთვის არის დამატებითი დამატებითი ხარჯის გაღება რაც გულისხმობს სალარო აპარატებით აღჭურვას და აქედან გამომდინარე ჩვენ ამ ვითარებას მხედველობაში ვიღებთ და ერთი წლით გავუხანგრძლივეთ ამ ვალდებულების შესრულება. ასევე ერთი წლით იქნება შეჩერებული კანონის ის ნორმა მსგავსი სალარო აპარატების არქონის შემთხვევაში ჯარიმის დაკისრებას“, - განაცხადა ეკა სეფაშვილმა.
დავით სონღულაშვილის, ნინო წილოსანის, ეკა სეფაშვილის, ისკო დასენის, ელგუჯა გოცირიძის, გოჩა ენუქიძისა და ბეჟან წაქაძის მიერ მომზადებულ საკანონმდებლო ინიციატივას პარლამენტი გამარტივებული წესით უახლოეს მომავალში განიხილავს.