ბაზრის გახსნას შესაძლოა ფასების ზრდა გამოეწვია — ამის შესახებ სემეკის თავმჯდომარემ დავით ნარმანიამ გადაცემა „პროფესიონალებში“ განაცხადა. 

მისი თქმით, მარეგულირებელმა შეძლო 2022 წელი ელექტროენერგიაზე და ბუნებრივ აირზე ტარიფების ზრდის გარეშე გადაეტარებინა.

„2022 წელი განსხვავებული იყო. საომარმა მოქმედებამ ბევრი რამ შეცვალა, დიდი გავლენა იქონია მიწოდების შეზღუდვაზე და შესაბამისად ფასებზეც. ამ ყველაფერმა ტარიფების გადახედვისკენ უბიძგა ჩვენს კოლეგა მარეგულირებლებს. ზოგიერთ ქვეყანას ფასების ზრდა მოუწია. 

საქართველო ვინაიდან პირდაპირ ენერგეტიკულად ბმული არ არის არცერთ მხარესთან რომელიც საომარ მოქმედებაშია ჩართული, შესაბამისად განსაკუთრებული გავლენა ვერ მოახდინა. მაგალითად ბუნებრივ აირი ძირითადად აზერბაიჯანიდან შემოდის, მხოლოდ ძალიან მცირე ნაწილია რუსეთიდან. რაც შეეხება ელექტროენერგიას, დეფიციტის პერიოდში მას ვიღებთ როგორც თურქეთიდან ასევე აზერბაიჯანიდან, რუსეთიდანაც ვიღებდით თუ აუქციონზე მათი ფასი დაბალი იყო, ვიდრე სხვა მეზობელი ქვეყნებიდან.

აზერბაიჯანიდან საქართველოს გავლით ევროპაში გაზის ტრანზიტი გაიზარდა, ამან ჩვენს ქვეყანას საშუალება მისცა უფრო შეღავათიანი გაზი მიიღოს აზერბაიჯანიდან. ამ ყველაფერმა საშუალება მოგვცა, 2022 წელი ტარიფების ზრდის გარეშე გადაგვეტარებინა, როგორც ელექტროენერგიის ასევე გაზის მიმართულებით. ელექტროენერგიის ტარიფები აგვისტოში გადავხედეთ და ასე დავტოვეთ, ენერგეტიკული ბაზრის გახსნამდე“, —აღნიშნა დავით ნარმანიამ.

მისი თქმით, ბაზრის გახსნის გადადება ტექნიკური საკითხების მოუგვარებლობამ და რუსეთ-უკრაინის ომმა გამოიწვია.

„მარეგულირებელი კომისია ბაზრის გახსნის სხვადასხვა საკითხებთან ერთად, მუშაობს მზაობის მონიტორინგზე. ვაკვირდებოდით ტექნიკურ საკითხებსაც და წინა გადადება სწორედ ამ საკითხს ეხებოდა. ელექტროსისტემის ტექნიკური ნაწილი არ იყო ბოლომდე მზად, რომ აღრიცხვა, ანგარიშგება და ტექნიკური საკითხები ზუსტად განხორციელოებულიყო, სწორედ ამიტომ საქართველოს მთავრობასთან რეკომენდაციით მივედით, რომ ბაზრის გახსნის გადავადება მომხდარიყო. მიმდინარე წლის გაზაფხულზე გადავადება ჩვენი რეკომენდაციის საფუძველზე მოხდა. თუმცა საომარმა მოქმედებამ გაზარდა რისკები და შესაძლოა ბაზრის გახსნას გამოეწვია ფასების ზრდა და ეს დიდი ალბათობით ასეც იქნებოდა, რადგან როდესაც დეფიციტის პირობებში შემოგაქვს ენერგია და ის ძვირდება, გახსნილი ბაზრის პირობებში უფრო გააძვირდებოდა და ეს იქნებოდა სიგნალი, რომ ადგილობრივი ფასებიც გაძვირებულიყო. მთავრობამ შეაფასა რა ეს რისკები და მიიღო გადაწყტვეტილება მისი გაზაფხულამდე გადადების შესახებ.

2023 წელს ველოდებით რომ საქმიანობების განცალკევების კუთხით უფრო კარგი წელი იქნება. ერთის მხრივ მარეგულირებელი ნორმა და ბაზა მზად არის და ხელს შეუიწყობს რომ სტაბილურად იმუშაოს სექტორმა, რაც შეეხება პოსტკოვიდურ პერიოდს, რაც ეკონომიკის გაჯანსაღებას სჭირდება დაენერგეტიკაზეც ახდენს გავლენას, ესეც ჩავლილი პერიოდია, ასე რომ უფრო კარგი მოლოდინი გვაქვს“, — ამბობს დავით ნარმანია.