რუსეთში კორონავირუსით ინფიცირების დონე იანვრის მაჩვენებლებს დაუბრუნდა, ხოლო მოსკოვში სიკვდილიანობა მორიგ რეკორდებს ხსნის.

კერძოდ, 24 ივნისს 20 182 ახალი შემთხვევა დაფიქსირდა, რაც 10 000–ით მეტია, ვიდრე თვის დასაწყისში. იზრდება გარდაცვლილთა რაოდენობაც – ამ მაჩვენებელმა 500–ს უკვე გადააჭარბა, რაც ასევე მეტია, ვიდრე წლის დასაწყისში.

ინფიცირების მკვეთრი ზრდა „ინდურ შტამს“ უკავშირდება და ახალი შემთხვევების 90% სწორედ მასზე მოდის.

პარალელურად მკაცრდება კოვიდ–რეგულაციები რესტორნების მიმართ. კერძოდ, 28 ივნისიდან რესტორნებში შესვლა ნებადართული იქნება მხოლოდ აცრილებისთვის და იმათთვის, ვინც პსრ–ტესტის უარყოფითი შედეგების ან ანტისხეულების არსებობის ცნობას წარადგენს.

სარესტორნო ბიზნესი ახალ რეგულაციას ნეგატიურად აფასებს და მერიას მის გადავადებას სთხოვს.

რესტორატორების ფედერაციის ვიცე–პრეზიდენტის ალექსეი ვასილჩუკის თქმით, მეწარმეები ამ ეტაპზე ხელისუფლებას სთხოვენ გამონაკლისის დაშვებას თუნდაც მხოლოდ ღია სივრცეებისთვის.

„ეს ორივე მხრიდან კომპრომისი იქნება, რადგანაც ღია სივრცეში დაინფიცირების ალბათობა ძალიან დაბალია, თანაც ვერანდაზე დისტანციის დაცვა ბევრად უფრო მარტივია. ვისაუბრეთ ამის თაობაზე მოსკოვის მერიის წარმომადგენლებთან და გვიპასუხეს, რომ ამ საკითხს განიხილავენ“, – განაცხადა მან.

პარალელურად, რუსეთში მზადდება ზომები მომსახურეობის სექტორში მომუშავე ადამიანების სავალდებულო ვაქცინაციის დასაწესებლადაც.

კერძოდ, ყველა კომპანია, რომელიც ამ დარგში მუშაობს, ვალდებული იქნება თანამშრომელთა სულ მცირე 60%–ის ვაქცინაცია უზრუნველყოს. დანარჩენ 40%–ში შევლენ მხოლოდ ის თანამშრომლები, რომლებმაც კორონავირუსი უკვე გადაიტანეს და შესაბამისად, საფრთხეს არ წარმოადგენენ.

ასევე ძალაში შევა მომსახურეობის სფეროში დასაქმებულების მიერ სამსახურში პირბადეების და ხელთათმანების სავალდებულო ტარება.

ამ ნორმების შეუსრულებლობის შემთხვევაში თანამშრომელი სამსახურს დაემშვიდობება.

რუსეთის პრეზიდენტის პრეს–მდივნის დმიტრი პესკოვის თქმით, ადამიანი, რომელიც სერვისის სფეროში მუშაობს, საზოგადოების წინაში თავის პასუხისმგებლობას უნდა აცნობიერებდეს.

„თუ ადამიანი მომსახურების სფეროში მუშაობს და აცრაზე უარის ამბობს, ის ამ სფეროში არ უნდა დარჩეს. შეუძლია წავიდეს და სხვა სამსახური იპოვოს, იმ სექტორებში, სადაც აცრა სავალდებულო არ იქნება. ადამიანი, რომელიც აცრილი არაა და ამავე დროს ბევრი კონტაქტი აქვს, პანდემიის დროს მომხმარებლებისთვის საფრთხეს წარმოადგენს, და ეს გასათვალისწინებელია“, – განაცხადა პესკოვმა.

მოსკოვის შემდეგ სერვისის სფეროს თანამშრომელთა სავალდებულო ვაქცინაცია რუსეთის სხვა რეგიონებშიც შემოაქვთ.

პარალელურად ზომები ტურისტულ სექტორშიც მკაცრდება – კერძოდ, 1–ლი აგვისტოდან შავი ზღვის კურორტებზე სასტუმროებში დასვენებას მხოლოდ აცრილები შეძლებენ. ეს ნორმა ამავე დროს იმათაც შეეხება, ვინც კორონავირუსი გადაიტანა.

გამონაკლისი მხოლოდ იმათთვის დაიშვება, ვისთვისაც ვაქცინაცია სამედიცინო ჩვენებების გამოა აკრძალული.

წყარო: bbc.com