საქართველო ბედნიერების ინდექსში მეზობელ ქვეყნებს ჩამორჩება. კერძოდ, ინდექსის მიხედვით ირკვევა, რომ რეგიონში  საქართველოს ყველაზე ნაკლებად ბედნიერი მოქალაქეები ჰყავს. გაეროს მსოფლიო ბედნიერების 2021 წლის ანგარიშის თანახმად ბედნიერების ინდექსით 150 სახელმწიფოს შორის საქართველო 108-ე ადგილზეა. თუმცა შარშანდელთან შედარებით მან პოზიცია გაიუმჯობესა. 2020 წლის ანგარიშში იგი 117-ე ადგილს იკავებდა.

ეკონომიკური ზრდა და მისი შენარჩუნება, ინფლაცია და უმუშევრობის დაბალი დონე, განათლების მაღალი ხარისხი ასევე მაღალი აკადემიური მიღწევები ჯანდაცვასა და ზოგადად, ჯანსაღი გარემოს შექმნაში - ეს ის ფაქტორებია, რომლებიც, სტატისტიკოს სოსო არჩვაძის შეფასებით, ბედნიერების ინდექსში ქვეყნის რეიტინგს განსაზღვრავს. მისი თქმით, კვლევა რამდენიმე კრიტერიუმზე დაყრდნობით ტარდება, მათ შორის - ერთ სულ მოსახლეზე მშპ-ს რაოდენობა, სოციალური მხარდაჭერა, ჯანსაღი ცხოვრების ხანგრძლივობა, თავისუფალი არჩევანის უფლება, სიუხვისა და კორუფციის აღქმა.

ამ ყველაფრის გათვალისწინებით, როგორც აღმოჩნდა, ქართული საზოგადოება თავს კარგად ნამდვილად ვერ გრძნობს და მისი მდგომარეობა, ამ თვალსაზრისით, საკმაოდ ნეგატიურია.

,,ბედნიერების ინდექსი უფრო ეგზოტიკური ინდექსია,  რომელიც პირდაპირ თუ არა, ირიბად მაინც  ეკონომიკურ მდგომარეობას უკავშირდება.  უმეტესწილად წარმოადგენს  საზოგადოების ძირითადი ფენების რეალობის აღქმას  და იმ მოლოდინებისადმი ფაქტობრივი მდგომარეობის შედარებას, რაც არსებობს საზოგადოებაში. როდესაც საზოგადოებას გააჩნია მაღალი მოთხოვნილებები, დიდი იმედი და პროგრესი, ხოლო ამ მიზნების მიღწევადობა შედარებით დაბალია, ეს იწვევს შემდეგ  იმედგაცრუებას, ვიდრე პირდაპირი ეკონომიკური კრიზისი. ქვეყანამ ბედნიერების ინდექსში კარგი პოზიცია რომ აჩვენოს, მოსახლეობას, ერს, სჭირდება რეალობის სრული აღქმა, ილუზიებისგან განთავისუფლება, სოციალური და ეკონომიკური ინფანტილიზმისგან რაც შეიძლება განთავისუფლება და მისი მინიმალიზაცია. სრული განთავისუფლება, სამწუხაროდ, წარმოუდგენელია, ვერც ერთი ქვეყანა ვერ ახდენს ამ სოციალური ინფანტილიზმისგან  სრულ განთავისუფლებას. ამიტომ დიდი მნიშვნელობა აქვს დადებითი ეკონომიკური მაჩვენებლების  მიღწევას, ზრდას, რომელიც შექმნის იმ მოლოდინებს, რაც საზოგადოებას გააჩნია ზოგადად ქვეყნისადმი და საკუთარ კეთილდღეობასთან მიმართებაშიც“, - განმარტავს სოსო არჩვაძე.

თუმცა, აქვე აღნიშნავს, რომ ბედნიერების ინდექსი ძალიან პირობითი და ხელოვნურია, რის გამოც დიდი მნიშვნელობა არ უნდა მივანიჭოთ.

ცნობისთვის, მეზობელ ქვეყნებთან შედარებით, საქართველო, ბედნიერების ინდექსით ჩამორჩება თურქეთს,  რომელიც 104-ე ადგილზეა. აზერბაიჯანი ბედნიერიების ინდექსში 90-ე პოზიციას იჭერს, სომხეთი 86-ე და რუსეთი 76-ე ადგილზეა წარმოდგენილი.

ანგარიშის მიხედვით, მსოფლიოში ყველაზე ბედნიერები ფინელები არიან, რომელიც 1-ელ ადგილს იკავებს, მე-2 ადგილზეა დანია, მესამე ადგილი გერმანიას უჭირავს. მე-4 და მე-5 ადგილებს ისლანდია და ნიდერლანდები ინაწილებენ.

მარი ჩიტაია