მინსკის საქალაქო სასამართლომ 12 წლით მიუსაჯა პატიმრობა ორ სპორტსმენს - ცურვაში მსოფლიო ჩემპიონ ალექსანდრა გერასიმენიას და ხელბურთელ ალიაქსანდრ ოპეიკინს. ისინი დამნაშავედ ცნეს ანტისახელმწიფოებრივ ქმედებებში, მათ შორის ბელარუსისთვის სანქციების დაწესების მოწოდებებით გამოსვლაში. განაჩენები გამოტანილ იქნა დაუსწრებლად, ქვეყნიდან ორივე სპორტსმენი წასულია.
სასამართლომ სპორტსმენებს ჯარიმაც დააკისრა, 600 ათას ბელარუსულ რუბლზე მეტი თანხის (220 ათასამდე ამერიკული დოლარი) ოდენობით. ამისთვის გაიცა ბრძანება, გაიყინოს გერასიმენიას საბანკო ანგარიშები და ქონება.
გერასიმენიამ და ოპეიკინმა 2020 წელს დააარსეს სპორტული სოლიდარობის ფონდი იმ სპორტსმენების დასახმარებლად, რომლებიც ბელარუსში რეპრესიებს აწყდებიან თავიანთი პოლიტიკური შეხედულებების გამო. როგორც ფონდის, ისე საკუთარი სახელით, ისინი ღიად გამოდიოდნენ ბელარუსის ავტორიტარი ხელმძღვანელის, ალიაქსანდრ ლუკაშენკას რეჟიმის საწინააღმდეგო განცხადებებით - კერძოდ, საერთაშორისო ოლიმპიურ კომიტეტს მოუწოდებდნენ ბელარუსის ეროვნული ოლიმპიური კომიტეტისთვის სანქციების დაწესებისკენ. ამავე დროს, სპორტსმენები საერთაშორისო კომპანიებს მიმართავდნენ, შეეწყვიტათ ბელარუსი სპორტსმენების სპონსორობა.
გამოძიების თანახმად, სპორტული სოლიდარობის ფონდის წევრების ზეწოლის შედეგად ბელარუსიდან გადატანილ იქნა რიგი მსხვილი სპორტული ღონისძიებები და სპორტსმენების ნაბიჯების გამო ქვეყანას მიადგა მნიშვნელოვანი საიმიჯო და ფინანსური ზიანი, ძირი გამოეთხარა ქვეყნის პრესტიჟს საერთაშორისო და პოლიტიკურ სცენაზე, დისკრედიტირებულ იქნა სპორტული სფეროს და სახელმწიფოს ხელმძღვანელობა.
ალექსანდრა გერასიმენია ცურვაში ევროპისა და მსოფლიოს ჩემპიონია, ის ორგზის იყო ოლიმპიური თამაშების ვიცე-ჩემპიონი.
ბელარუსი
