ბელგია საქართველოს „ასტრაზენეკას“ ვაქცინას საჩუქრად გადასცემს. ინფორმაციას ქვეყნის საგარეო საქმეთა სამინისტრო ავრცელებს. აღნიშნული ინფორმაციის თანახმად, 2021 წლის ბოლომდე ბელგია, ძირითადად კოვაქსის პლატფორმის გავლით, მესამე ქვეყნებისთვის 4 მილიონი დოზა კოვიდვაქცინის დონაციას გეგმავს.
ბელგიის საგარეო საქმეთა სამინისტროს ცნობით, პირველ რიგში ასტრაზენეკას ვაქცინების 168,000 დოზა უკრაინაში გაიგზავნება. ამას მოჰყვება 225,600 დოზა კოსოვოს, სომხეთისა და საქართველოსთვის. ამ ეტაპზე არ ზუსტდება, კონკრეტულად რა რაოდენობის ვაქცინას მიიღებს აღნიშნული სამი ქვეყნიდან თითოეული.
ბელგიის საგარეო საქმეთა სამინისტროს თანახმად, ბელგია ვაქცინებით დაეხმარება ასევე აფრიკის, დასავლეთ ბალკანეთის, აღმოსავლეთ სამეზობლოსა და სამხრეთ ევროპის ქვეყნებს. დახმარების პრიორიტეტებს შორისაა ასევე ბელგიის განვითარების თანამშრომლობის 14 პარტნიორი ქვეყანა. სამინისტროს განმარტებით, ვაქცინებით დონაციისას მხედველობაში იქნება მიღებული დახმარების პოტენციურ მიმღებ ქვეყნებში არსებული ჯანდაცვის მდგომარეობა და ვაქცინაციის შესაძლებლობები.
საქართველოში კოვიდ-19-ის საწინააღმდეგო აცრა ოთხი პრეპარატითაა შესაძლებელი. ესენია „სინოვაკი“, „სინოფარმი“, „ასტრაზენეკა“ და „ფაიზერი“.
4 აგვისტოს მონაცემებით, საქართველოში 542 639 აცრაა ჩატარებული, აქედან სრულად აცრილია 171 908 ადამიანი.
გასული დღე-ღამის განმავლობაში საქართველოში კორონავირუსის 4233 ახალი შემთხვევა გამოვლინდა. გარდაიცვალა COVID-19-ით დაავადებული 38 პაციენტი, 1934-ით გაიზარდა კორონავირუსისგან გამოჯანმრთელებულთა რიცხვი.
2020 წლის 26 თებერვლიდან, როცა საქართველოში კორონავირუსით ინფიცირების პირველი ფაქტი დადასტურდა, სულ აღრიცხულია 432 903 შემთხვევა. მათგან 390 827 გამოჯანმრთელების. COVID-19-ით გარდაცვლილია 5948 ადამიანი.