უკრაინის შეიარაღებულმა ძალებმა რუსეთის ტერიტორიაზე საპასუხო იერიში ბოლო 1 კვირაში უკვე მეორედ მიიტანეს. ბელგოროდში იარაღის საწყობის განადგურების შემდეგ, ახლა უკვე ნავთობბაზა დაბომბეს, ზარალი 21 მლნ ლიტრი საწვავია.
ნავთობბაზაზე შეტევა 2 უკრაინული MI 24 ტიპის შვეულმფრენით განხორციელდა. უკრაინელმა მფრინავებმა ერთდროულად სიმამაცე და პროფესიონალიზმი გამოიჩინეს. მათ რადარებისგან თავის ასარიდებლად 50 მეტრის სიმაღლეზე მოუწიათ ფრენა. მათ 27-დან 8 რეზერვუარი გაანადგურეს, თითოეულში 2000 ტონა საწვავი ინახებოდა. 1000 ტონა საწვავი კი 1300 ლიტრია. ამ ოდენობის საწვავი 1000 ტანკს 5000 კმ-ზე მეტის გავლას შეძლებდა, თუ რა თქმა უნდა, გზად ამერიკული ჯაველინების, ბრიტანული NLAW-ების ან თურქული ბაირაქტარების წინააღმდეგობას არ გადააწყდებოდნენ.
ბერდიანსკის პორტთან ჩაძირულ გემზე რუსეთმა განაცხადა რომ ხანძრის გამო, შესაძლო დეტონაციას მოერიდნენ და თავად ჩაძირეს, ბელგოროდში იარაღის საწყობის აფეთქება „ადამიანური შეცდომით“ ახსნეს. ორივე შემთხვევაში მთავარი მოქმედი პირი სინამდვილეში უკრაინული Точка იყო. იქამდე 1 თვით ადრე ომის დაწყებიდან მეორე დღეს, 25 თებერვალს, უკრაინამ ასევე Точка-თი როსტოვის სამხედრო აეროდრომიც დაბომბა და მინიმუმ 1 SU30-ის ტიპის მრავალფუნქციური თვითმფრინავი გაუნადგურა.
რუსეთი უკრაინაში 24 თებერვალ შეიჭრა და ამ დრომდე ბირთვულის გარდა თითქმის ყველა ტიპის იარაღი გამოიყენა, მათ შორის აკრძალული თერმობარული (ვაკუუმური) და ფოსფორის ბომბებიც. ყველა საერთაშორისო კონვენციის დარღვევით დაბომბა: საცხოვრებელი კორპუსები, სკოლები, ბავშვთა სახლები, საბავშვო ბაღები, მოხუცთა თავშესაფრები, უნივერსიტეტი, საავადმყოფოები, სამშობიარო, თეატრი, რომლის ეზოშიც ორი მხრიდან უზარმაზარი ასოებით ДЕТИ (ბავშვები) ეწერა. მშვიდობიანი მოსახლეობის მსხვერპლის ოდენობამ 6500-ს გადააჭარბა, მატერიალურმა ზარალმა წინასწარი შეფასებით $0.5 ტრლნ-ს, ამ ყველაფრის ფონზე კრემლის პრესსპიკერმა დმიტრი პესკოვმა ნავთობბაზის დაბომბვის კომენტირებისას აღნიშნა, რომ მომხდარი მოლაპარაკებების პროცესი „არაკომფორტულ გარემოს“ ქმნის, წერს რუსული გამოცემა kommersant.ru.