საქართველოში საწვავის ღირებულებამ ახალ ისტორიულ მაქსიმუმს მიაღწია. ბრენდირებულ ბენზინგასამართ სადგურებზე რეგულარის ტიპის ბენზინის ფასმა 3.55 ლარს, პრემიუმის 3.65 ლარს, სუპერის 3.72 ლარს, დიზელის ღირებულებამ კი 3.65-ს მიაღწია. უახლოეს მომავალში ფასმა შესაძლოა 4.00 ლარიან ნიშნულსაც გადააჭარბოს, რაც მიმდინარე კვირაში თავად ნავთობპროდუქტების იმპორტიორთა კავშირის თავმჯდომარემ ვანო მთვრალაშვილმა კომერსანტთან საუბრისას დაადასტურა. ეკონომისტთა ნაწილი 4.5 ლარიან ფასსაც პროგნოზირებს. ფასების შემდგომი კლების ერთადერთი გამოსავალი ირანთან და ვენესუელასთან მოლაპარაკებების წარმატებით დასრულებაა. თავის მხრივ საქართველოს ერთადერთი რაც შეუძლია თუნდაც დროებით აქციზის გადასახადის გაუქმებაა, ეს არსებულ ფასებს ვეღარ, მაგრამ მათ ზრდის ტემპს შეაჩერებს.
რუსეთის უკრაინაში შეჭრის შემდეგ, ბარელი ნავთობის ფასმა 14 წლიანი რეკორდი მოხსნა და $130-ს გადააჭარბა. ომს რუსული ნავთობის მიმართ ნაწილობრივი ბოიკოტიც დაემატა. შეერთებულმა შტატებმა და ბრიტანეთმა მის შესყიდვაზე ოფიციალური უარი განაცხადეს. დანარჩენი ქვეყნები მას $25-იანი ფასდაკლებით ყიდულობენ.
პიკის შემდეგ, ირანთან და ვენესუელასთან მიმდინარე მოლაპარაკებების ფონზე ბარელი ნავთობის ფასი თითქმის $20-ით $113-მდე შემცირდა. ირანს დღიურად მიწოდების 1 მლნ ბარელით გაზრდა შეუძლია. ვენესუელა დამტკიცებული მარაგებით #1 სახელმწიფოა.
საწვავი განსაკუთრებული პროდუქტია და მისი ფასის ცვლილება ინფლაციაზე პირდაპირ აისახება. ომამდე საქართველოში იმედი ჰქონდათ, რომ ორნიშნა ინფლაცია შემცირებას მარტიდან დაიწყებდა. მთავრობის მოლოდინი დიდი ალბათობით აღარ გამართლდება.