რუსულ საწვავზე მოთხოვნა იზრდება. 2022 წლის იანვარ-აპრილში რუსეთიდან ბენზინის და დიზელის იმპორტი 25,1%-ს აღწევს, რითაც იგი ლიდერ პოზიციაზეა. ნავთობპროდუქტების იმპორტიორთა კავშირის ხელმძღვანელი ვანო მთვრალაშვილი ამის მიზეზად რუსული საწვავის ფასს მიიჩნევს და აცხადებს, რომ ამ ეტაპზე რუსეთიდან საწვავის  იმპორტი შეღავათიან ფასში შემოდის, რაც თურქმენულ და ევროპულ ნავთობპროდუქტებზე იაფია.

მიიღე ინფორმაცია უფრო სწრაფად „კომერსანტის“ Telegram-ზე.

ვანო მთვრალაშვილის ინფორმაციით, მიმდინარე წლის იანვარ-აპრილის განმავლობაში ბენზინისა და დიზელის საწვავის იმპორტის ყველაზე დიდი მოცულობა განხორციელდა რუსეთიდან - 83,9 ათასი ტონა, რაც მთელი იმპორტის 25,1%-ს შეადგენს.

,,რუსეთიდან ნავთობპროდუქტების იმპორტი შეუფერხებლად ხორციელდება, არანაირი დაბრკოლება ამ მიმართულებით არ შეიმჩნევა. ჩვენ არ ვართ გამონაკლისი, ვინც მიმდინარე პერიოდში რუსეთიდან ყიდულობს ნავთობპროდუქტებს, ევროპაც მათ შორისაა. საქართველოს შემთხვევაში, მთავარი განმაპირობებელი ფაქტორი დაბალი ფასია. ისე მოხდა, რომ ბევრი ქვეყანა თუ  კერძო კომპანია რუსულ პროდუქტზე უარს აცხადებს.  იმის გამო, რომ რეალიზაციის რისკი გაიზარდა, რუსეთი ნავთობპროდუქტებს ფასდაკლებით ჰყიდის, ციფრებს ვერ დავასახელებ, თუმცა ფასი ევროპულ და თურქმენულ  პროდუქტზე დაბალია.  ომია და როგორ შეიძლება სიტუაცია შეიცვალოს, ვერ გეტყვით, თუმცა ამ ეტაპზე რუსეთიდან იმპორტში შეღავათი ნამდვილად იგრძნობა“,  - განაცხადა ვანო მთვრალაშვილმა.

ნავთობპროდუქტების იმპორტიორთა კავშირის ინფორმაციით, რუსეთის შემდეგ ბენზინისა და დიზელის საწვავის იმპორტში ქვეყნების პოზიციები ასე გამოიყურება: რუმინეთი - 82,4 ათასი ტონა - 24,7%;   ბულგარეთი - 65 ათასი ტონა - 19,5%; აზერბაიჯანი - 50 ათასი ტონა - 15%; თურქმენეთი - 39,8 ათასი ტონა - 11,9%; თურქეთი - 7,6 ათასი ტონა - 2,3%; საბერძნეთი - 3,2 ათასი ტონა - 1%;  ყაზახეთი - 1,2 ათასი ტონა - 0,4%, სეიშელი - 0,5 ათასი ტონა - 0,1%; შვეიცარია - 0,1 ათასი ტონა - 0,03%.

მარი ჩიტაია