„შიდა ქართლის ტერიტორიაზე დაფიქსირებულია 107.3 მგჰც სიხშირეზე არალიცენზირებული რადიო მაუწყებლობა ოკუპირებული ტერიტორიების მხრიდან“, - ასე პასუხობს დეპუტატ თეონა აქუბარდიას კითხვას კომუნიკაციების ეროვნული კომისიის თავმჯდომარე კახი ბექაური.

როგორც პარლამენტის ვებგვერდზე განთავსებული ინფორმაციიდან ირკვევა, დეპუტატი რუსული არხების მიერ საქართველოს ტერიტორიაზე უკანონო დაფარვით დაინტერესდა.

როგორც სადეპუტატო შეკითხვაში აქუბარდია აღნიშნავს, საქართველოს ცენტრალურ ავტომაგისტრალზე კასპიდან მოყოლებული გორამდე ქართულ სიხშირეზე FM 107.3  რუსული რადიო მაუწყებლობის— „ავტორადიო“  უკანონო შეღწევა ხორციელდება.

იმავდროულად საქართველოს მიერ კონტროლირებად სოფლებში საოკუპაციო გამყოფ ხაზთან რუსული ტელევიზიები მაუწყებლობენ სატელიტური თეფშის გამოყენებით, როგორც შიდა ქართლის, ასევე სამეგრელო/აფხაზეთის გამყოფ ხაზებთან.

თეონა აქუბარდია დაინტერესდა კომუნიკაციების ეროვნული კომისია ახორციელებს თუ არა, ან ხომ არ გეგმავს მონიტორინგის ჩატარებას და იგეგმება თუ არა გარკვეული ზომების გატარება საერთაშორისო სამართლებრივ დონეზე რუსეთის წინააღმდეგ საინფორმაციო სივრცის დასაცავად.

კახი ბექაურის განმარტებით კი, კომისია პერიოდულად ატარებს რადიო მონიტორინგს საქართველოს მთელ ტერიტორიაზე და შიდა ქართლის ტერიტორიაზე დაფიქსირებულია 107.3 მგჰც სიხშირეზე არალიცენზირებული რადიო მაუწყებლობა ოკუპირებული ტერიტორიების მხრიდან.

„რაც შეეხება თქვენს მიერ ნახსენებ სატელევიზო მაუწყებლობას თანამგზავრულ თეფშის გამოყენებით, გთხოვთ დაგვიზუსტოთ რას გულისხმობთ, რადგანაც მთელი რიგი რუსული არხების (ისევე როგორც სხვა უცხოური არხების) თანამგზავრული მაუწყებლობა შესაბამისი მიმღების და ანტენის (თეფშის) საშუალებით ხელმისაწვდომია საქართველოს მთელ ტერიტორიაზე, რამდენადაც „მაუწყებლობის შესახებ“ საქართველოს კანონის 453 მუხლის პირველი პუნქტის თანახმად, საქართველოს ტერიტორიაზე ნებადართულია სხვა სახელმწიფოებში ავტორიზებული/ლიცენზირებული მედიამომსახურებების (რომელიც მოიცავს ტელემაუწყებლობასაც) თავისუფალი მიღება და შეუზღუდავი გავრცელება,“ — აღნიშნულია კახი ბექაურის მიერ თეონა აქუბარდიასათვის მიწერილ წერილში.