ბერლინის გიგანტური აკვარიუმი, სადაც 1500 თევზი ბინადრობდა, გასკდა. შემთხვევა ბერლინის ცენტრში, დღეს დილით, 5:45 წუთზე მოხდა. უზარმაზარი AquaDom-ი, რომელიც სასტუმრო Radisson-ის ეზოში, კარლ-ლიბკნეხტის ქუჩაზე მდებარეობდა, მთლიანად ჩამოინგრა. დაშავდა აკვარიუმის პერსონალი, თევზების ნაწილი კი დაიხოცა.

გერმანული მედიის ინფორმაციით, მაშველები შემთხვევის ადგილზე 15 წუთში მივიდნენ. მაგრამ იმ დროისთვის 16-მეტრიანი აკვარიუმიდან პრაქტიკულად არაფერი იყო დარჩენილი. კარლ-ლიბკნეხტის ქუჩის გასწვრივ მოძრაობა გადაიკეტა.

პოლიციის ინფორმაციით, ორი დაზარალებული საავადმყოფოში გადაიყვანეს. აკვარიუმში მყოფი 100 სხვადასხვა სახეობის დაახლოებით 1500 თევზის გადარჩენა ვერ მოხერხდა.

12,8 მილიონი ევროს ღირებულების აკვარიუმი ბერლინის მიტეს რაიონში 2004 წელს გაიხსნა. ის სასტუმრო Radisson-ის დეკორაცია და DomAquarée კომპლექსის ნაწილი იყო. ობიექტის მფლობელების თქმით, ის მსოფლიოში ყველაზე დიდი ცილინდრული ფორმის აკვარიუმი იყო.