უახლოეს პერიოდში საქართველოში ავტოსკოლები გარკვეულ რეგულაციებს დაექვემდებარებიან. საკანონმდებლო ცვლილებები მომზადებულია და განხილვებიც მიმდინარეობს. ზუსტად რას მოიცავს რეგულაციები ჯერ-ჯერობით უცნობია, დოკუმენტის დეტალები პროცესის დასრულების შემდეგ გახდება ცნობილი.
„საქართველოს ტრანსპორტისა და გზების ასოციაციის“ ხელმძღვანელმა დავით მესხიშვილმა „კომერსანტთან“ საუბრისას განაცხადა, რომ ავტოსკოლები დაწესებულ კრიტერიუმებს უნდა აკმაყოფილებდნენ, ინსტრუქტორებს უნდა ჰქონდეთ შესაბამისი კვალიფიკაცია და მხოლოდ ამის შემდეგ უნდა იყოს შესაძლებელი მათთვის სტატუსის მინიჭება. ამის გარდა, მისი თქმით, ბევრი ავტოსკოლა, ვინც ეს სახელი დაირქვა, პრაქტიკულად თაღლითურ საქმიანობას ეწევა და მოსწავლეებს ეწ. ხრიკებით და კოდირებით ამზადებს.
„დღევანდელი მონაცემებით ავტოსკოლები ჩვეულებრივი შპს-ებია, რომელთაც არ მოეთხოვებათ არც კვალიფიკაცია და არც მატერიალურ-ტექნიკური ბაზის არსებობა. მათ მიმართ მოთხოვნები უდრის ნულს. პრაქტიკულად არ ვიცით რამდენი ავტოსკოლაა საქართველოში იმიტომ, რომ ეს სტატუსი სახელმწიფოს მხრიდან არავის აქვს მინიჭებული“ - განაცხადა დავით მესხიშვილმა.
მან ევროპულ გამოცდილებაზეც ისაუბრა და აღნიშნა, რომ არ არსებობს ევროპაში ქვეყანა, სადაც ავტოსკოლა ნებართვისა და კონკრეტული კრიტერიუმების დაკმაყოფილების გარეშე ფუნქციონირებს, იმიტომ რომ ის, რაც ავტოსკოლაში ისწავლება სიცოცხლესთანაა დაკავშირებული.
„ჩვენს რეალობაში კიდევ ის პრობლემაა, რომ ისიც კი არ ვიცით ვინ არიან ინსტრუქტორები, ვინც პრაქტიკულ მეცადინეობებს ატარებს, არც სასწავლო პროგრამაა ერთიანი. ბევრი ავტოსკოლა, ვინც ეს სახელი დაირქვა, პრაქტიკულად თაღლითურ საქმიანობას ეწევა და მოსწავლეებს ეწ. ხრიკებით და კოდირებით ამზადებს - აქ თუ რაღაც იწყება „ა“ ასოზე, პასუხი არის „ბ“, თუ ჭა არის დახატული, პასუხი არის „გ“ და თეორიულ გამოცდას მოტყუებით აბარებენ. შესაბამისად, მართვის მოწმობას იღებს ადამიანი, რომელსაც არ აქვს არანაირი ცოდნა და როცა ჩვენ ვსაუბრობთ, რომ კატასტროფაა ყოველწლიურად გზებზე დაღუპული 450 ადამიანი და 10 000-ზეტი დაშავებული, ამის ერთ-ერთი მიზეზი უნდა ვეძებოთ იმაში, როგორი განათლების სისტემა გვაქვს, კონკრეტულად მართვის მოწმობის ასაღებად,“ - განაცხადა დავით მესხიშვილმა.
მისი თქმით, თუ მართლა გვინდა, რომ მცოდნე ადამიანმა აიღოს მართვის მოწმობა, მართლა დაინერგოს ქვეყანაში ევროდირექტივები და მართლა გვინდა შედეგის მიღწევა, პრობლემის მოგვარება სათავიდან უნდა დავიწყოთ. პრობლემის სათავე კი ავტოსკოლებშია.
„ჩემი აზრით, ავტოსკოლებს უნდა მოეთხოვებოდეთ გარკვეული კრიტერიუმების დაკმაყოფილება, უნდა არსებობდეს ერთიანი სასწავლო პროგრამა და ერთიანი მიდგომა ყველა ავტოსკოლის მიმართ,“ — განაცხადა დავით მესხიშვილმა.
მოამზადა მაკა ბიბილაშვილმა