ბევრი უცხოური კომპანია საქართველოში შემოდის არა იმიტომ, რომ ბაზარი აითვისონ, არამედ ჩვენთან ტექნოლოგიური ბიზნესის შექმნა და გატესტვა ძალიან მარტივია, აქ პროდუქტის შექმნა იაფია — განაცხადა საქართველოს „ფინტექ ასოციაციის“თავმჯდომარე დავით კიკვიძემ, „კომერსანტის“ ეთერში ბანკინგის მნიშვნელობაზე საუბრისას.

„ღია ბანკინგი პირველი და მნიშვნელოვანია იმისთვის, რომ ფინტექი განვითარდეს. ბაზარი რომ გაიზარდოს სხვა სიახლეებიც არის საჭირო, თუმცა ეს პირველია, რადგან ამ შემთხვევაში არსებული ბიზნესები უფრო მარტივად შეძლებენ ახალი სერვისების და პროდუქტების შექმნას. ასევე ფინტექ კომპანიების და ბანკების კონკურენცია გადაიზრდება კოლაბორაციაში და ეს აბსოლუტურად შეცვლის მთლიანად საფინანსო სისტემას, ახალ შესაძლებლობებს გააჩენს. გარდა ამისა, საერთაშორისო ინვესტორების დაინტერესება იქნება კატასტროფულად მაღალი, რადგან ამას ერთი მნიშვნელოვანი წინაპირობა გააჩნია — ძალიან ბევრი უცხოური კომპანია საქართველოში შემოდის არა იმიტომ, რომ ქართული ბაზარი აითვისონ, უბრალოდ საქართველოში ტექნოლოგიური ბიზნესის შექმნა და გატესტვა ძალიან მარტივია. პროდუქტს ქმნიან, რაც ძალიან იაფი ჯდება, რადგან ადამიანური რესურსი იაფია ანუ ხელფასი ორჯერ ნაკლებია ვიდრე ევროპელი სპეციალისტის, ყველანაირი ინფრასტრუქტურა მარტივად ხელმისაწვდომია, პროდუქტს ტესტავენ და ფაქტობრივად იდეალურ მდგომარეობამდე მიჰყავთ. შემდეგ გადიან საერთაშორისო ბაზრებზე, განსაკუთრებით ახლომდებარე ქვეყნებში, მაგალითად უზბეკეთი, ტაჯიკეთი, თურქეთი, ყაზახეთი. ასევე კარგი ის არის, რომ სათაო ოფისები საქართველოში აქვთ და აქედან ხდება მართვა, შესაბამისად ღია ბანკინგის განვითარება საერთაშორისო ინვესტორებს მისცემს შესაძლებლობას, რომ საქართველო რეალურად რეგიონალური ჰაბი გახდეს. 

ბანკებს ამ მიმართულებით დაწყებული აქვთ პირველადი ნაბიჯები, მაგალითად მომხმარებელს ინტერნეტბანკინგში უჩანს რამდენიმე ბანკის ანგარიში, თუმცა ეს ძალიან პრიმიტიული წინ გადადგმული ნაბიჯია. საჭიროა ფინტექ კომპანიებიც აქტიურად ჩაერთონ პროცესში. ეროვნულმა ბანკმა მიიღო კრიტერიუმები რომელიც ფინტეკ კომპანიებმა უნდა დააკმაყოფილონ, თუმცა ამ ეტაპზე ამის ტექნიკური შესაძლებლობა არ არის. ჯერ მხოლოდ შექმნილია ბანკებს შორის ანგარიშების გამოჩენის ტექნიკური შესაძლებლობა, სხვა ტიპის კოდები არ არის და ეს არის გამოწვევა რომ წინ წავწიოთ“, — განმარტავს დავით კიკვიძე.

2021 წლიდან ბანკებს ერთმანეთში ფინანსური ინფორმაციის გაზიარების შესაძლებლობა უკვე აქვთ, რაც იმას ნიშნავს, რომ მომხმარებელი საკუთარ ფინანსებს ერთ სივრცეში აკონტროლებს. უკვე აღარ არის საჭირო ერთდროულად რამდენიმე ინტერნეტ ბანკის ჩამოწერა. ყველა ოპერაციას უკვე ერთი აპლიკაცია ითავსებს. ბანკების ჩართულობა მხოლოდ პირველი ეტაპია. შემდეგ ეტაპზე ინფორმაციაზე წვდომა ფინტეკებსაც ექნებათ. ღია ბანკინგის ევროპულ და ამერიკულ გამოცდილებაზე დაყრდნობით აშკარაა, რომ ამით აუცილებლად გაიზრდება ფინტეკების რაოდენობა და ფინანსური სერვისებიც გაცილებით მრავალფეროვანი გახდება.

მოამზადა ნინო თამაზაშვილმა