ალერგოლოგ-იმუნოლოგის, ბიძინა კულუმბეგოვის განცხადებით, მსოფლიოში კორონავირუსის ახალი ვარიანტის გავრცელება ინფექციის ახალი ძალებით შემობრუნებას ნიშნავს. ის მოსახლეობას კიდევ ერთხელ მოუწოდებს, დაიცვას უსაფრთხოების წესები.

„მასში თავმოყრილი მონაცემები იძლევა იმის შეფასების საშუალებას, რომ ის არის იმდენად სახეცვლილი, რომ, გარკვეულწილად, პრობლემები იქმნება არსებულ იმუნიტეტთან - იქნება ხელოვნური თუ შეძენილი იმუნიტეტი. რეინფიცირების განვითარების ისევ მაღალი რისკი ექნებათ. ეს ახალი ტალღებით, ინფექციის ახალი ძალებით შემობრუნებას ნიშნავს, რაც ძალიან სამწუხარო და რთული სცენარია. პირველ რიგში, ყველა ადამიანმა უნდა იცოდეს, რომ პერსონალური დაცვის საშუალებების მაქსიმალური გამოყენება იცავს ყველა ვარიანტის ვირუსისგან, ეს „ომიკრონი“ იქნება, „ალფა“, „ბეტა“ თუ „დელტა“, - აცხადებს ბიძინა კულუმბეგოვი.

კორონავირუსის ახალი ვარიანტი „ომიკრონი“ უკვე მსოფლიოს არაერთ ქვეყანაშია გამოვლენილი. შტამის გავრცელების გამო, 29 ნოემბრიდან აშშ სამხრეთ აფრიკიდან და აფრიკის შვიდი სხვა ქვეყნიდან ავიამიმოსვლას შეაჩერებს.

ჯანდაცვის მსოფლიო ორგანიზაციამ საგანგებო სხდომაზე სამხრეთ აფრიკაში გამოვლენილ კორონავირუსის ახალ ვარიანტს „შემაშფოთებელი“ უწოდა. უწყებაში აცხადებენ, რომ ახალი ვარიანტის შესასწავლად რამდენიმე კვირა დასჭირდებათ, თუმცა უკვე ცნობილია, რომ ახალ ვარიანტს ძალიან ბევრი მუტაცია აქვს.

სამხრეთ აფრიკაში, მეცნიერებმა განაცხადეს, რომ კორონავირუსის ახალი ვარიანტი აღმოაჩინეს, რომელსაც უამრავი მუტაცია აქვს. ჯანდაცვის მსოფლიო ორგანიზაციის მთავარმა მეცნიერმა, სუმია სვამინატანმა განაცხადა, რომ ახალ ვარიანტს სპაიკის პროტეინში არაერთი შემაშფოთებელი მუტაცია აქვს.

კორონავირუსის ეს შტამი ჯერ საქართველოში არ გამოვლენილა, თუმცა, ცირკულირებს სხვა შტამები.

imedinews.ge