ბოლო 6 კვირის მანძილზე ბელარუსიდან გერმანიაში 6000-ზე მეტი ლტოლვილი შევიდა. ისინი ბელარუსში 2 გავლენიანი ადამიანის სანქციით ჩაჰყავთ.
ის, რომ ალექსანდრ ლუკაშენკოს აზიელი არალეგალები ბელარუსში ჩაჰყავს და შემდეგ მათ ევროკავშირში აგზავნის და ამაში პირდაპირ მონაწილეობენ იქაური ძალოვნები, უკვე კარგად ცნობილია.
ნაკლებად ცნობილია, რომ ამ საქმეში მას ვლადიმერ პუტინი ეხმარება და კიდევ ნაკლებად ის, რომ ევროკავშირზე ამ შეტევაში თურქეთის ლიდერი რეჯეფ ტაიპ ერდოღანიც მონაწილეობს.
ორივე პრეზიდენტი ლუკაშენკოს ლოგისტიკურად ეხმარება - ამ ინფორმაციას ფლობენ გერმანიის სპეცსამსახურები. კერძოდ, მიგრანტების აზიის ქვეყნებიდან ბელარუსში გადაყვანაში მნიშვნელოვან როლს ავიაკომპანიები Аэрофлот (51% სახელმწიფოს ეკუთვნის) და Turkish Airlines (49%-ით სახელმწიფო) ასრულებენ.
ეს ფაქტი ასევე გერმანიის ფედერალური პოლიციის უფროსმა ჰაიკო ტეგაცმა დაადასტურა.
ეს ევროკავშირს სერიოზული პრობლემის წინაშე აყენებს - ერთია სანქციების შემოღება ბელარუსულ ავიაკომპანია „ბელავიას“ მიმართ და სულ სხვაა - მძლავრი და გავლენიანი რუსული და თურქული ავიაგადამზიდავების წინააღმდეგ, რომლებსაც ევროკავშირის საჰაერო მიმოსვლაში მნიშვნელოვანი ადგილი უჭირავთ.
რამდენიმე დღის წინ მინსკის აეროპორტში ზამთრის ფრენების განრიგი გამოქვეყნდა, რომელიც მარტის ბოლომდე იმოქმედებს. ჩამონათვალშია კვირაში 57 რეისი ახლო აღმოსავლეთში, მათ შორის ისეთი ეგზოტიკური მიმართულებები, როგორც ერბილი (ჩრდილოეთ ერაყი) და სამოქალაქო ომში გახვეული სირიის დედაქალაქი დამასკო.
შედარებისთვის - 2019 წელს ამ რეგიონში კვირაში მხოლოდ 17 რეისი სრულდებოდა.
ლტოლვილები ასევე დიდი რაოდენობით ჩამოდიან თურქეთიდან, სადაც მილიონობით არასასურველი აზიელი მიგრანტი დაგროვდა და ქვეყნის ხელისუფლება მათ თავიდან მოშორებას ცდილობს.
ახალი რეისების უმრავლესობას ერთი და იგივე უცნაურობა ახასიათებთ - ისინი საერთოდ არაა გათვალისწინებული ჩვეულებრივი მგზავრებისთვის - ხვალ რომ მათზე ბილეთების ყიდვა მოისურვოთ - ამას ვერ გააკეთებთ, რადგან მათზე ინფორმაცია აეროპორტის დაჯავშნის სისტემაში არ იძებნება.
მაგალითად, მინსკიდან თურქულ კურორტ ანტალიაში რეისები ყოველდღე სრულდება, მაგრამ ბილეთები არ იყიდება.
რეისს დამასკოში ემსახურება ავიაკომპანია Cham Wing, რომელსაც სირიელი დიქტატორის ბაშარ ასადის ბიძაშვილი ფლობს. ყოველდღიური ფრენების მიუხედავად, ბილეთების ყიდვა ან დაჯავშნა შეუძლებელია.
იგივე სხვა მიმართულებებსაც ეხება, რაც აშკარად იმის მაჩვენებელია, რომ ეს არაა ჩვეულებრივი, კომერციული ფრენები. სწორედ ამ თვითმფრინავებით ჩამოჰყავთ ლტოლვილები ბელარუსში და ორი ძლიერი სახელმწიფოს ჩართულობა ამ ძირგამომთხრელ საქმიანობაში საქმეს მნიშვნელოვნად ართულებს.
bild.de
პუტინი
