BILETEBI.GE-ს ოფიციალური განცხადებას ავრცელებს და განმარტავს, რომ ერთ-ერთი წამყვანი ბანკი საქართველოში აქტიურად ახორციელებს ქართული ონლაინ ბიზნესების შესყიდვას, რასაც თან სდევს კონკურენტების ჩამოშორება ყველა მის ხელში არსებული მექანიზმით - იქნება ეს ფინანსური, საინფორმაციო თუ საკრედიტო საშუალებები.
„აღნიშნული პოლიტიკის შედეგად ხდება ჩვენს სფეროში მცირე და საშუალო ბიზნესისთვის ჟანგბადის სრული გადაკეტვა, რადგან საბანკო ზეწოლით ბანკი ახერხებს გააფორმოს ექსკლუზიური კონტრაქტები სხვადასხვა სერვისის მომწოდებელთან, რაც კრიტიკულია ჩვენნაირი ბიზნესისთვის. მოგეხსენებათ ონლაინ ბიზნესის ფუნქციაა დააკავშიროს მომხმარებელი სერვისის მომწოდებელთან.
თუ ასე გაგრძელდა, ბაზარზე დარჩება ერთი და უკონკურენტო მოთამაშე, რაც დააზიანებს ყველას.
ამის თავიდან ასაცილებლად, ჩვენი აზრით, აუცილებელია რაც შეიძლება მალე მიღებული იქნას კანონი, რომელიც შეუზღუდავს საფინანსო ინსტიტუტებს არაპროფილური ბიზნესების ფლობას ან როგორც მინიმუმ, აკრძალავს ექსკლუზიური კონტრაქტების გაფორმებას სერვისის მონოპოლისტ მომწოდებლებთან.
ჩვენი მხრივ, ჩვენ მზად ვართ მაქსიმალურად ვითანამშრომლოთ ყველა და პირველ რიგში საკანონმდებლო და ანტიმონოპოლიურ ორგანოებთან, რათა მოხდეს ამ კანონის ისეთი სახით მომზადება, რითიც ის დაიცავს ბიზნესის ამ სფეროს კონკურენტული გარემოს ჩამოშლისაგან“, — განმარტავენ BILETEBI.GE-ში.
„კომერსანტი“ კონკურენციის სააგენტოს დაუკავშირდა, სადაც განაცხადეს, რომ კონკურენციის უწყება აღნიშნული საკითხით დაინტერესებულია, კონსულტაციების შემდეგ კი კანონმდებლობის შესაბამისად იმოქმედებს.