2022 წელს საქართველოში არაერთი მნიშვნელოვანი და მსხვილი ბიზნეს გარიგება დაიდო. „კომერსანტი“ გთავაზობთ რამდენიმე ყველაზე მნიშვენლოვან ბიზნეს მოვლენას, რომლითაც მიმდინარე წელი გამორჩეული იყო:
Binance საქართველოში ოფისს გახსნის და ინვესტიციებს ჩადებს
უმსხვილესი საერთაშორისო ბირჟის - Binance CZ-ის დამაარსებელმა და გენერალურმა დირექტორმა ჩანპენ ჩჟაომ საქართველოში ვიზიტისას განაცხადა, რომ ქვეყანაში Binance-ის გუნდს უკვე 2 წარმომადგენელი ჰყავს, მაგრამ აპირებს, რომ საქართველოში ოფისი გახსნას, ადგილობრივი გუნდი გაზარდოს, კრიპტოს განვითარებაში მეტი საგანმანათლებლო ძალისხმევა ჩადოს და სხვა ბლოკჩეინებშიც განახორციელოს ინვესტიციები.
მსოფლიოში უდიდეს კრიპტოვალუტის ბირჟას - Binance-ს შვილობილი კომპანიები მსოფლიოს არაერთ ქვეყანაში, მათ შორის, ესპანეთში, იტალიაში, საფრანგეთში, ბაჰრეინსა და არაბთა გაერთიანებულ საამიროებში აქვს. ფორბსის მონაცემებით, ჩანგპენგ ჟაოს ქონება 17,4 მილიარდ დოლარს შეადგენს.
ილონ მასკის კუთვნილი Starlink საქართველოშია
პირველად საქართველოში, კომპანია „გრინნეტმა“ თანამგზავრული ინტერნეტის პროგრამა Starlink-ი ჩამოიტანა. საქართველოში ორი Starlink-ი SpaceX-თან შეთანხმებით ჩამოიტანეს.
„Starlink-ის სერვისი საქართველოში ჯერჯერობით ოფიციალურად არ გააქტიურებულა, ჩვენ Starlink-თან შეთანხმება გვაქვს, რომ კონკრეტული კლიენტებისთვის და პროექტებისთვის სადემონსტრაციოდ და სატესტოდ გაამართვინებდნენ. თუმცა ოფიციალურ ჯერ არ გაშვებულა. ზუსტი თარიღი ჯერ უცნობია, თუმცა სავარაუდოდ, მომავალი წლის დასაწყისში გაეშვება, რაც ოფიციალურად უკვე გამოცხადდა. Starlink-ის წარმომადგენელი რამდენჯერმე საქართველოში იყო, კომუნიკაციის კომისიასთანაც ჰქონდა ურთიერთობა“ – განაცხადა „გრინნეტის“ ბიზნესის განვითარების დირექტორმა დავით ბოლქვაძემ.
საქართველოს მთავრობა „ბორჯომის“ აქციონერი გახდა
13 ივნისს ცნობილი გახდა, რომ სახელმწიფოს საკუთრებაში უსასყიდლოდ „ბორჯომის“ მმართველ კომპანია RISSA INVESTMENT LIMITED-ის 7.73%-იანი წილი გადაეცა. შედეგად, კომპანიაში სანქცირებული რუსი ოლიგარქის მიხაილ ფრიდმანის აქციათა პაკეტი 57.72%-დან 49%-მდე შემცირდა. მხარეებს შორის შეთანხმებით, სააქციო პაკეტთან ერთად, სახელმწიფო წარმოდგენილი იქნება „ბორჯომის“ დირექტორთა საბჭოში ერთი ხმის უფლების მქონე დირექტორით, რომელიც ასევე დირექტორთა საბჭოს ხელმძღვანელი იქნება და მას ექნება წარმმართველი როლი. ნოემბერში მთავრობამ „ბორჯომის“ სამეთვალყურეო საბჭოს თავმჯდომარედ გიორგი მაისურაძე დანიშნა.
აქციების გადაცემამდე რამდენიმე თვით ადრე, უკრაინაში მიმდინარე ომის და რუსეთის წინააღმდეგ დაწესებული სანქციების გამო, „ბორჯომმა“ ქარხნების დახურვის შესახებ განაცხადა. 19 პარილს „IDS ბორჯომი საქართველომ“ კიდევ ერთი განცხადება გაავრცელა, რომლითაც კომპანიის მფლობელი გამოხატავდა მზადყოფნას მთავრობისთვის აქციების ნაწილის უსასყიდლოდ გადაცემის თაობაზე.
ესპანურმა Aqualia-მ GWP იყიდა
2022 წლის საქართველოს ინფრასტრუქტურის სექტორში ბოლო წლების ერთ-ერთი უმსხვილესი გარიგება შედგა. „საქართველოს კაპიტალმა“ მისი შვილობილი კომპანია Georgian Global Utilities-ის (GGU) საკონტროლო პაკეტი ესპანურ გიგანტს, AQUALIA-ს მიჰყიდა. გარიგება 2022 წლის პირველ კვარტალში დასრულდა და მის ფარგლებში Aqualia-მ თბილისის წყალმომააგებაზე პასუხისმგებელი GWP შეისყიდა. კომპანიის 80%-იანი წილის სანაცვლოდ ინვესტორმა $180 მილიონი დოლარი გადაიხადა.
მთლიანობაში GWP-ის აქტივების ღირებულება 225 მილიონი დოლარია და Aqualia 2025-2026 წლებში კომპანიის დარჩენილი წილის გამოსყიდვასაც გეგმავს. Aqualia ევროპაში მეოთხე უდიდესი წყალმომარაგების კომპანიაა, ხოლო მეცხრე მსოფლიოში.
პირველი ციფრული ბანკი საქართველოში
2022 წლის 17 ნოემბერს საქართველოს ეროვნულმა ბანკმა სს პეისერა საქართველოზე, ციფრული ბანკის ლიცენზირების პრინციპების გათვალისწინებით, საბანკო საქმიანობის ლიცენზია გასცა. ციფრული მოდელის გათვალისწინებით, პეისერა საქართველოს მომსახურებით სარგებლობა შესაძლებელი იქნება დისტანციურად ფილიალებისა და სერვის ცენტრების გარეშე.
სს „პეისერა საქართველოს“ დირექტორატში არიან გიორგი ჩრდილელი, დიმისტრი ქუმსიშვილი და ირაკლი თოიძე. სს პეისერა საქართველოს საბანკო საქმიანობის ლიცენზიის მიღებიდან 4 თვის მანძილზე სატესტო რეჟიმში იმუშავებს და რეალურ გარემოში საბანკო საქმიანობის განხორციელება შეზღუდული ექნება.