„ბინები ან არ აშენდება ან ძვირი იქნება“, - ამის შესახებ „კომერსანტს“ მენაშენეთა ასოციაციის თავმჯდომარემ ირაკლი როსტომაშვილმა განუცხადა. მისი თქმით, სამშენებლო მასალებზე მნიშვნელოვნად გაზრდილი ფასები უახლოეს მომავალში უძრავ ქონებას გააძვირებს. ირაკლი როსტომაშვილის ამბობს, რომ საქართველოში უძრავი ქონების საშუალო ფასი 800 დოლარი არასდროს იქნება. ბიზნესმენის აზრით, ეს თანხა 1 000 დოლარამდე გაიზრდება.
„უძრავი ქონების ფასი, რა თქმა უნდა, გაიზრდება, რადგან არმატურის ფასი გაორმაგდა, სამშენებლო მასალების იმპორტი გაძვირდა, ბეტონი, ინერტული მასალები, ყველაფერი, რისგანაც მშენებლობა შედგება, გაძვირდა. შესაბამისად, ბინები ან არ აშენდება, ან ძვირი იქნება. მე ყველაზე მეტად მაშინებს ის, რომ უბრალოდ მყიდველი აღარ იქნება.
გამოვრიცხავ, რომ კვ.მ. გასაყიდი ფასი 800 დოლარი ოდესმე კიდევ ღირდეს, რადგან ბინები იაფად ვეღარ აშენდება. მხოლოდ არმატურა, რომელიც 700 დოლარი ღირდა, ახლა 1 200 დოლარი ღირს. 1 000 დოლარზე ნაკლები გასაყიდი ფასი მშენებლისთვის არარენტაბელური იქნება, აზრი არ ექნება.
ჩემი ვარაუდით გაყიდვები შემცირდება იმიტომ, რომ პროცესს ეკონომიკური ზრდა ვერ ეწევა. ვფიქრობ, რომ მოსახლეობის გარკვეული კატეგორია ბინის შეძენას ვერ შეძლებს. 100 კვ.მ ბინა თუ ღირდა პირობითად 75 000 დოლარი, ახლანდელ პირობებში 100 000 დოლარზე ნაკლებად ვერ გაიყიდება. მშენებელი თავისი ხარჯით ხომ არ ააშენებს? მგონია, რომ ბევრი სამშენებლო კომპანია, რომელსაც მიმდინარე პროექტები აქვს სერიოზულ პრობლემებში იქნება. იმედია მთავრობის ეკონომიკური გუნდ ამ საკითხზე ფიქრობს“, - აცხადებს ირაკლი როსტომაშვილი.
შეგახსენებთ, რომ საქსტატის ინფორმაციით, 2021 წლის III კვარტალში მშენებლობის ღირებულების ინდექსი წინა კვარტალთან შედარებით 1.8 პროცენტით გაიზარდა. აღნიშნული ცვლილება, ძირითადად, განპირობებული იყო სამშენებლო მასალებზე ფასების 2.7 პროცენტიანი მატებით, რამაც 1.59 პროცენტული პუნქტი შეიტანა ჯამური ინდექსის ცვლილებაში.
წინა 2020 წლის შესაბამის კვარტალთან შედარებით მშენებლობის ღირებულების ინდექსი 14.1 პროცენტით გაიზარდა. ინდექსის ზრდა, ძირითადად, გამოწვეული იყო სამშენებლო მასალებზე ფასების 19.6 პროცენტიანი ზრდით. რაც 11.07 პროცენტული პუნქტით აისახა მთლიანი ინდექსის ცვლილებაზე.