საქართველოში პრემიუმის ტიპის საწვავის ფასი, შესაძლოა, 3.85 ლარამდე გაიზარდოს,- ამის შესახებ „ბიოილის“ გენერალურმა დირექტორმა რუსუდან რამაზაშვილმა „ბიზნეს ფორმულას“ ეთერში განაცხადა.
როგორც მან აღნიშნა, საერთაშორისო ბაზარზე ნავთობის ფასის ზრდამ და ლარის გაუფასურებამ, საქართველოში საწვავის ფასზე გავლენა უკვე მოახდინა.
„სანავთობო ბირჟებზე ერთი კვირის წინ ბარელი ნავთობის ფასმა 130 დოლარს მიაღწია. დღეს ბარელის ფასი 110 დოლარია. ამ არასტაბილურობიდან გამომდინარე, ასევე ლარის კურსის გათვალისწინებით, საცალო სექტორში ფასები გაზრდილია. ახლა ჩვენთან ევრო რეგულარის ტიპის საწვავი 3.45 ლარი ღირს, თუმცა ვხედავთ რომ ბრენდირებულ ბენზინგასამართ სადგურებში უკვე 3.65 ლარზე ივაჭრება. ვფიქრობდით, რომ ფასი 4 ლარზე ავიდოდა, მაგრამ მსოფლიო ბაზარზე საწვავის ღირებულების 20 დოლარიანი კლება, ახლა, საშუალებას გვაძლევს, ფასი 3.45 - 3.50 ლარის ზემოთ არ ავწიოთ.
პრემიუმის ფაზის ზრდა, ჩვენთან, 3.80 - 3.85 ლარის ფარგლებში იქნება მოსალოდნელი“,- აღნიშნა რუსუდან რამაზაშვილმა.
შეგახსენებთ, რუსეთის უკრაინაში შეჭრის ფონზე, ნავთობის ფასი რეკორდულად გაიზარდა და 140 დოლარიან ნიშნულსაც კი გადააჭარბა. არსებობს პროგნოზები, რომ ნავთობის ფასი შესაძლოა $200-მდე გაზარდოს.
საწვავი
