„ბიოილის“ გენერალური დირექტორის რუსუდან რამაზაშვილის განცხადებით, როგორც ბრენდირებული ასევე არაბრენდირებულ ბენზინგასამართი სადგურების მოგების მარჟა ამ ეტაპზე 15-20 თეთრს არ აღემატება და საწვავის ფასი საქართველოში იმ რეალობას ასახავს, რაც ნავთობპროდუქტების საერთაშორისო ბაზრებზეა.
„არაბრენდულ ბენზინგასამართ სადგურებზე საწვავის ფასი ამ ეტაპზე 3.52 ლარიდან 3.80 ლარის ფარგლებში მერყეობს, გააჩნია საწვავის ტიპს. თუ ერთი ბარელი ნავთობის ფასი საერთაშორისო ბაზარზე 117-120 დოლარის ფარგლებში დარჩა საწვავის ფასის კლებას საქართველოში არ უნდა ველოდოთ.
საშუალოდ 4 ლარი ლიტრზე, არის ის რეალური ნიშნული რაც ყველა ფაქტორის გათვალისწინებით უნდა ღირდეს დღეს საწვავი საქართველოში. სხვა შემთხვევაში წაგებაზე მოუწევთ კომპანიებს მუშაობა. დაახლოებით 15-20 თეთრიანი მარჟა სჭირდება კომპანიას, რომ მუშაობა გააგრძელოს და თანამშრომლები შეინახოს. საწვავის გაძვირება არაა კომპანიების ინტერესში ვინაიდან გაყიდვები მცირდება“,- განუცხადა „ბიზნეს ფორმულას“ რამაზაშვილმა.
მისი განმარტებით, იმ შემთხვევაში თუ საწვავზე აქციზის (500 ლარი - ბენზინი, 400 ლარი - დიზელი) და დღგ-ს გადასახადი (ლარიდან 18 თეთრი) გაუქმდება ან შემცირდება, ეს საწვავის ფასს 60-55 თეთრით შეამცირებს, თუმცა საკითხავია რამდენად აიტანს ამას სახელმწიფო ბიუჯეტი.
როგორც რამაზაშვილი აცხადებს, საწვავის ფასებს საერთაშორისო ბაზარზე და საქართველოშიც ძირითადად რუსეთ-უკრაინის ომის მიმდინარეობა განსაზღვრავს და შესაბამისად, ფასებთან დაკავშირებით რაიმე პროგნოზის გაკეთება ამ ეტაპზე შეუძლებელია.
საქართველოში ზოგიერთი ტიპის საწვავის ფასი 4 ლარს უკვე აჭარბებს. რუსეთის უკრაინაში შეჭრის ფონზე, ნავთობის ფასი რეკორდულად გაიზარდა და 140 დოლარიან ნიშნულსაც კი გადააჭარბა. არსებობს პროგნოზები, რომ ნავთობის ფასი შესაძლოა, $200-მდე გაიზარდოს.
22 მარტის ვაჭრობის შედეგებით, ლონდონში Brent-ის ტიპის ნავთობის ფასმა ბარელზე 115.48 დოლარი შეადგინა.