სამედიცინო ველნეს კურორტი დაბა კოჯორში „ბიოლი“ , რომელიც თითქმის სრულად უცხოელ მომხმარებელზე იყო გათვლილი, პანდემიის შემდეგ, ქართველების დასვენების სტილზე მორგებას ცდილობს, თუმცა პრემიუმ ხარისხის სერვისებზე კურორტის ხელმძღვანელობამ ფასების განახევრება გადაწყვიტა. როგორ ერგება შიდა ტურიზმს პირველი სამედიცინო ველნესი საქართველოში, ამის შესახებ „კომერსანტს“ Bioli Medical Wellness Resort-ის დამფუძნებელი თამაზ მჭედლიძე ესაუბრა.
„პანდემიამდე “ბიოლი” 90%-ით უცხოელებზე იყო გათვლილი, ვისთვისაც ველნესი ცხოვრების სტილია. ეს საქართველოში პირველი საერთაშორისო დონის ველნეს კურორტია, რომელიც ქართულ ეთნო პროცედურებთან კომპინაციაში უცხოელებისთვის საინტერესოა. მაგრამ საზღვრების ჩაკეტვის გამო, ქართველ მომხმარებელზე გადაწყობა მოგვიწია.
რა თქმა უნდა, ამ საქმეს ფასების სერიოზული კორექტირება დასჭირდა, ასევე რაღაცების გაადვილება, კვების რაციონის გაქართულება და ადგილობრივ მოთხოვნებზე ადაპტირება. მართალია სერვისის დონე კვლავ მაღალი დავტოვეთ, რადგან პერსონალს უმაღლეს ხარისხზე რომ გადაამზადებ, მას ვერ გადააჩვევ, ასევე გარემოს ვერ შეცვლი. ფასები კი მივწურ - მოვწურეთ, მაგრამ ის იდეა და იმ იდეის ხარისხი მილიგრამობითაც არ შეგვიმცირებია და არ გადაგვიხვევია, უბრალოდ ადგილბრივი მომხმარებელი მაინც ვერ ხვდება აქ რა არის. მაინც, ქართველებში უფრო ტრადიციულ დასვენებაზეა მოთხოვნა — ამოვიდე დავისვენო, რამე ვჭამო, დავლიო და უბრალოდ გავისეირნო.
ჩვენთან მომხმარებელი იღებს უნიკალურ პროცედურებს და სერვისებს, რადგან საქართველოში ცნება „ქართული ველნესის“ შესაქმნელად ჩამოვედი. თავიდანვე ამაში ვდებდი ფულს და თავიდანვე ვიცოდი, რომ ეს დღეს და ხვალ არ მომიტანდა იმ მოგებას, რაც კლინიკებს მოაქვს საზღვარგარეთ. მაგრამ ეს იდეოლოგია, რომ ქმნი იმას, რაც არავის გაუკეთებია თან შენს სამშობლოში, ამის მოტივაცია ძალიან მაღალი მაქვს,— ამბობს თამაზ მჭედლიძე.
როგორ შეხვდა ქართველი მომხმარებელი „ბიოლის“უფრო ხელმისაწვდომ ფასებს და რამდენად მზადაა ჯანმრთელობის რესურსების მართვის კულტურის მისაღებად ადგილობრივი დამსვენებელი, ამაზე თამაზ მჭედლიძე ამბობს, რომ ველნეს კულტურაზე ქართველს რადიკალურად განსხვავებული წარმოდგენა აქვს, ვიდრე ის სინამდვილეშია. კერძოდ, ჩვენთვის დასვენება ბევრად მარტივი ელემენტარული ფუფუნების საგნებით შემოიფარგლება, ვიდრე ორგანიზმის გაჯანსაღება.
„დასვენება საქართველოს მოქალაქის ცნებაში არის აუზში ბანაობა, ჰაერზე ასვლა - ეს არის უკვე მეოცე საუკუნის პარადიგმა, სანატორიუმების პერიოდის მიდგომა.
მაგალითად, ქართველები აუზს ითხოვენ , ამბობენ — „თუ აუზი არ გაქვთ რა კურორტია“. სინამდვილეში, ჯანმრთელობის რესურსების მართვაზე, უჯრედულ დონეზე ორგანიზმის გაძლიერებისთვის, მე აუზი არც მჭირდება. აუზი არის საჭყუმპალაო, ეს სპა არ არის, ეს სამედიცინო ველნესია, სადაც ადამიანს ჯანმრთელობის რესურსების მართვას უჯრედულ დონეზე ვასწავლით და ამაში ვეხმარებთ.
ველნესი სხვა ცნებაა და ადგილობრივებისთვის ძალიან იშვიათია. ის ადამიანები, ვინც ლანცერჰობში, მერანოში, სხვადასხვა კურორტებზე დადიან ხოლმე და პერიოდულად ჯანმრთელობის პრვენციას აკეთებენ - აი ის ადამიანები უკვე ხვდებიან, აქ რას იღებენ და თვეობით ამოდიან ხოლმე, ცხოვრობენ და პროგრამას გადიან. ზოგი ამოდის უბრალოდ კოტეჯში სუფთა ჰაერზე დასასვენებლად.
საზღვრების გახსნის მერე, პირველ რიგში ისევ უცხოელები წამოვლენ, მათ ერთი სული აქვთ როდის ჩამოვლენ, რადგან ველნესის კულტურაც აქვთ და გემოვნებაც. მათ იციან ამ ადგილის ფასი, კონკრეტულად „ბიოლის“ მიკროკლიმატის ფასი. აქ ხედებია, სივრცეებია, კავკასიონს უყურებ და მთელი დაძაბულობა იხსნება,“ - ამბობს „ბიოლის“ დამფუძნებელი.
როგორც თამაზ მჭედლიძემ აღნიშნა, ახლა ბიოლში დასვენების ღირებულება ქართველი მომხმარებლისთვის 150 დოლარამდეა შემცირებული მაშინ, როდესაც კოტეჯის ქირაობა პანდემიამდე 450 დოლარის ექვივალენტი ღირდა.
„ჩვენი ველნეს კოტეჯის ქირაობა თუ ადრე ღირდა 450 დოლარის ექვივალენტი, ახლა 140-150 დოლარამდე ღირს. ადრე თითქმის სულ დატვირთული იყო, როგორც მიღებულია ზაფხულში 90%-ით, დანარჩენ პერიოდებში — 60-65%-მდე.
ჩვენ ახლა პროგრამას ვამზადებთ, რომ ავხსნათ რა არის ჯანმრთელობის რესურსების გაძლიერება, მისი მართვა, რათა ყველამ გაიგოს რისთვის არის კურორტი „ბიოლი“ შექმნილი,“ - განმარტავს მჭედლიძე.
შპს „მედგრუპ ჯორჯიას კუთვნილი სამედიცინო ველნეს კურორტი „ბიოლი- ს მშენებლობა 2013 წელს დაიწყო და 2016 წელს გაიხსნა. პირველ ეტაპზე განხორციელებული ინვესტიციების ოდენობამ 12 მილიონი აშშ დოლარი შეადგინა.
მარიამ მორგოშია