კურორტ "ბიოლის" დამფუძნებელი თამაზ მჭედლიძე ველნეს ინდუსტრიის განვითარებას საგანმანათლებლო სფეროშიც გეგმავს. როგორც ბიზნესმენი „კომერსანტთან“ განმარტავს, რამდენიმე ასეულ მილიონიანი უცხოური ინვესტიციის მეშვეობით, მალე საქართველოში მაგისტრატურის საფეხურს დაემატება ველნეს თერაპევტების გადამზადების ფაკულტეტი მედიკოსებისთვის. 2 წლის განმავლობაში ველნესის ფაკულტეტის სტუდენტები პრაქტიკებს „ბიოლში“ გაივლიან.

„ჩემი სერიოზული ამოცანაა, რომ საქართველოში ველნეს ინდუსტრია შეიქმნას და ამას რამდენიმე წელი დასჭირდება. ახლა „ბიოლის“ გაფართოების პროექტი მზადდება, დაემატება ახალი სივრცეები. რაც ახლა არის, ეს მხოლოდ დასაწყისია. „ბიოლი“ იქნება სრულყოფილი 5 ვარსკვლავიანი ველნესი. ახლა ვაკეთებ ველნეს თერაპევტების მაგისტრატურის  მიმართულებას. ვაპირებთ ჩამოვიყვანოთ უცხოელები და ვასწავლოთ ველნეს თერაპიის ქართული ელემენტები.

მიუხედავად იმისა, რომ საქართველო არ განიხილება ელიტარულ ველნეს მიმართულებად, მე მინდა რომ საფუძველი ჩავუყარო და ამისთვის ინსტიტუტიც მჭირდება. ახლა მოლაპარაკებები მაქვს სხვადასხვა უნივერსიტეტებთან, სადაც შემიძლია ბაზა გავაკეთო ველნეს თერაპევტების მაგისტრატურისთვის. სამედიცინო სპეციალისტები უნდა გადავამზადოთ როგორც თერაპევტები, პრაქტიკას კი „ბიოლში“გაივლიან. ასეთი სპეციალისტები ძალიან მოთხოვნადი იქნება მსოფლიოშიც. „ბიოლი“ კი იქნება ქართული ველნესის ფუძემდებელი. საერთაშორისო დონის ინვესტორების შემოყვანა მოხდება და არ არის საუბარი 10-20 მილიონზე, არამედ 100 მილიონ ლარზე მეტი მოცულობის ინვესტიცია განხორციელდება. ამ პროექტმა დიდი ბიძგი უნდა მისცეს ველნეს ინდუსტრიას და ამისთვის ყველანაირი საფუძველი გვაქვს,“ - განმარტავს თამაზ მჭედლიშვილი.

შეგახსენებთ, მედიცინის მეცნიერებათა დოქტორმა თამაზ მჭედლიძემ შპს „მედგრუპ ჯორჯიას“ კუთვნილი სამედიცინო ველნეს კურორტ ბიოლის მშენებლობა კოჯორში 2013 წელს დაიწყო. კურორტს ხარისხიანი და ნატურალური კვების პროდუქტებით საკუთარი ფერმა და სათბური  უზრუნველყოფს.

თამაზ მჭედლიძე რუსეთში კლინიკების ქსელი „მედის“ მფლობელიცააა.