კრიპტობაზარი ვარდნას განაგრძობს. მისი ჯამური კაპიტალიზაცია 2021 წლის იანვრის შემდეგ პირველად $865 მლრდ-მდე შემცირდა, რაც პიკთან შედარებით 72%-ით ნაკლებია. ბოლო ერთ კვირაში სთეიბლკოინების გარდა, კრიპტოვალუტათა აბსოლუტური უმრავლესობის ღირებულება ორნიშნა პროცენტული მაჩვენებლით შემცირდა.

ბიტკოინი გასული წლის ნოემბერში $69 000 ღირდა, მისი კაპიტალიზაცია $1.270 ტრლნ-ს აღწევდა, ანუ იმაზე 45%-ით მეტს ვიდრე ამჟამინდელი მთელი კრიპტოკაპიტალიზაცია, ახლა ციფრული ფულის გიგანტის ღირებულება $20 300-ს შეადგენს რაც 2020 წლის დეკემბრის შემდეგ ყველაზე დაბალი მაჩვენებელია. დამატებით 10%-იანი ვარდნის შემთხვევაში მისი ფასი 2017 წლის დეკემბრის ღირებულებას გაუტოლდება.

ეთერიუმის ღირებულება $1000-იან ზარს უახლოვდება. ის ბოლო ერთ კვირაში 40%-ით, ბოლო 8 თვეში კი 80%-ით გაიაფდა.

რიპლის ფასი 30 ცენტამდეა შემცირებული. სხვა კრიპტოებისგან განსხვავებით რიპლს 2020-2021 წლებში რეკორდი არ მოუხსნია. ის ყველაზე ძვირი - $3.84 2018 წლის იანვარში ღირდა და მას მერე ღირებულების 92% დაკარგა.

ილონ მასკის გაპიარებული დოჯკოინი ახლა 5.2 ცენტი ღირს - 93%-ით ნაკლები ვიდრე გასული წლის მაისში.

მთელს მსოფლიოში მაღალი ინფლაცია, შეერთებულ შტატებში საპროცენტო განაკვეთის ზრდა და ახალი ზრდის მოლოდინი კრიპტოვალუტის ფასებს ამცირებს, რასაც ტრეიდერთა ნაწილის მიერ პანიკური გაყიდვებიც ემატება. ზუსტი პროგნოზის გაკეთება შეუძლებელია, თუმცა უახლოესი პერიოდი მაინც არასტაბილურად გამოიყურება და ალბათობა იმის, რომ ბაზარზე ხარები დაბრუნდებიან ჯერჯერობით დაბალია. ცოტა უფრო შორეულ მომავალში 2024-2025 წლებში კი შეიძლება ახალი რეკორდებიც მოიხსნას.