მეხუთე დღეა ბიტკოინის ფასი იკლებს. 27 აგვისტოს უმსხვილესი კრიპტოვალუტის ფასი ისევ ჩამოსცდა 20 000 დოლარს, რაც 6-კვირიანი მინიმუმია.
როგორც წესი, ბიტკოინის ფასის კლება სხვა, შედარებით ნაკლები საბაზრო კაპიტალიზაციის მქონე ციფრული ვალუტების ფასებზე აისახება. ასე მაგალითად, ბოლო კვირის განმავლობაში Ethereum-ის ღირებულება 10%-ით დაეცა და 1,442 დოლარი ღირს, BNB 6.44%-ით, 278 დოლარამდე დაეცა და სხვ.
აშშ-ს ფედერალური რეზერვის ხელმძღვანელის, ჯერომი პაუელის ანონსით, სავარაუდოა, რომ სექტემბერში ამერიკაში მონეტარული პოლიტიკა კიდევ უფრო გამკაცრდება და საპროცენტო განაკვეთი 75 საბაზო პუნქტით გაიზრდება.
საპროცენტო განაკვეთის ზრდა კრიპტოსამყაროში რყევებს იწვევს. მაღალი განაკვეთის პირობებში დაკრედიტება მცირდება, ინვესტორები კი ახალ სარისკო აქტივებში დაბანდებისგან თავს იკავებენ, პორტფელში უკვე არსებულ ამგვარ აქტივებს კი ყიდიან. გამომდინარე იქიდან, რომ ციფრული ვალუტები არასტაბილურ აქტივებად ითვლებიან, ამგვარ პირობებში მათ ბევრი ინვესტორი ყიდის, რასაც, შესაბამისად, ფასზეც აქვს გავლენა.
პაუელის ამ განცხადებამ საფონდო ბირჟაზეც ვნებათაღელვა გამოიწვია და ბოლო სავაჭრო სესიაზე 3%-ზე მეტით შემცირდა S&P 500-ის, Dow Jones-ისა და Nasdaq-ის ინდექსები.