ბიტკოინის ღირებულებამ კიდევ ერთი რეკორდი მოხსნა და $68 000-ს გადააჭარბა. მისი კაპიტალიზაცია $1.3 ტრლნ-ს აღწევს, ყველა კრიპტოვალუტის ჯამური კაპიტალიზაცია კი $3 ტრლნ-ს.

ციფრული ფულის შესახებ მილტონ ფრიდმანი ჯერ კიდევ გასული საუკუნის მიწურულს 1999 წელს საუბრობდა. 9 წლის შემდეგ, 2008 წლის ოქტომბერში ბიტკოინის შესახებ გაჩნდა ცნობები. მისი შემქმნელი თავს სატოში ნაკამოტოს უწოდებს. გავლენიანმა გამოცემებმა რამდენჯერმე სატოში ნაკამოტო ილონ მასკთან გააიგივეს, თუმცა მასკმა აღნიშნული უარყო.

ბიტკოინის გაყიდვები 2009 წელს დაიწყო და ის ცენტები ღირდა. ერთ-ერთი პირველი ტრანზაქციით 2010 წლის მაისში ფლორიდაში 2 პიცა 10 000 ბიტკოინად გაიყიდა. მაშინ ის $30-ის ექვივალენტი იყო, დღეს $681 მლნ-ზე მეტი იქნებოდა.

მსოფლიო ეკონომიკური კრიზისის დროს, ბიტკოინისთვის სერიოზული ყურადღება თითქმის არავის მიუქცევია. ფართო საზოგადოების ყურადღება ციფრულმა ვალუტამ პირველად 2017 წელს მიიპყრო, მაშინ როცა მისმა ღირებულებამ $20 000-ს მიაღწია. სწორედ ამ პერიოდში დიდმა სახელმწიფოებმა ბიტკოინის რეგულირება დაიწყეს, შეზღუდეს მაინინგი და ტრანზაქციები, რამაც მისი ფასი $6000-მდე შეამცირა.

თუ 2008-2009 წლების ეკონომიკური კრიზისის დროს ბიტკოინი დაიბადა, 2020 წლის კორონა-კრიზისის დროს ის ხელმეორედ აღზევდა და წლის ბოლოს ფასმა $29 000-ს გადააჭარბა, 2021 წლის აპრილში კი უკვე $64 000-ს.

ბიტკოინის კვალდაკვალ ისტორიულ მაქსიმუმზეა ეთერიუმის ღირებულებაც და მისი ფასი ამჟამად $4800-ს აჭარბებს, ხოლო კაპიტალიზაცია $570 მლრდ-ს.

გაზრდილია სხვა ალტკოინების ფასებიც, თუმცა მათ რეკორდამდე ჯერ კიდევ ბევრი უკლიათ. რიპლი $1.26 ღირს, ეს აპრილის ფასის 65% და 2018 წლის იანვრის ღირებულების 33%-ა. 28 ცენტზეა დოჯკოინიც, მაშინ როცა მიმდინარე წლის 8 მაისს მისმა ღირებულებამ 73 ცენტს მიაღწია, თუ ბიტკოინმა ნოემბერში ახალი რეკორდი მოხსნა, დოჯკოინმა ვარდნის შემდეგ ჯერჯერობით ღირებულებიც ნახევარიც ვერ დაიბრუნა.

კრიპტოსამყაროში გადაჭრით რაიმეს თქმა ძნელია, თუმცა წინა პერიოდებში ალტკოინების ფასის ცვლილება ბიტკოინის ფასის ცვლილებას რამდენიმე კვირის დაგვიანებით მიჰყვებოდა, თანაც უფრო დიდი ნაბიჯებით. პირობითად თუ ბიტკოინის ფასი 30%-ით იზრდებოდა, სხვა ალტკოინები 3-4 კვირის შემდეგ 50-60 პროცენტით იზრდებოდა, იგივე ხდებოდა ვარდნის შემთხვევაშიც.