ბიზნეს -ცენტრებში გაფორმებული ახალ საიჯარო კონტრაქტებში ფასები 10 % -დან 30 %- მდე შემცირდა. ამის შესახებ „Colliers International“-ის მიერ მომზადებულ კვლევაში ვკითხულობთ.
დოკუმენტის მიხედვით ირკვევა, რომ თანამედროვე ბიზნეს ცენტრების საშუალო შეწონილი იჯარა 2020 წლის პირველი ნახევრის მდგომარეობით 14.4 აშშ დოლარს შეადგენს. მათი ინფორმაციით, 2020 წლის პირველ ნახევარში საშუალო შეწონილი იჯარა ყველაზე მეტად შემცირდა არაკლასიფიცირებულ ბიზნეს ცენტრებში 4%-ით და ფასი კვადრატულ მეტრზე 13.8 აშშ დოლარს შეადგინა. 2%-ითაა შემცირებული აღნიშნული მაჩვენებელი A კლასის ბიზნეს ცენტრებში და 22.2 აშშ დოლარს შეადგენს, 1%-იანი კლება დაფიქსირდა B კლასში - ფასი 14.3 აშშ დოლარია კვადრატულ მეტრზე, ხოლო C კლასში ეს მონაცემი უცვლელი დარჩა და 11.3 აშშ დოლარის ნიშნულზეა.
„Colliers International“- ში ამბობენ, რომ 2020 წლის პირველი ნახევრის მდგომარეობით ვაკანტურობის კოეფიციენტი A კლასსა და C კლასის თანამედროვე ბიზნეს ცენტრებში შემცირდა, რაც უმეტესწილად პანდემიამდე პერიოდში განხორციელდა. მათი ინფორმაციით, A კლასში კვლავაც ყველაზე მაღალია ვაკანტურობა და ეს რიცხვი 21.5%-ს შეადგენს, მას მოსდევს C კლასი 16.5%-ით და B კლასი 14%-იანი ნიშნულით, ხოლო არაკლასიფიცირებული ბიზნეს ცენტრების საშუალო ვაკანტურობა 7.2%-ს შეადგენს. თანამედროვე ბიზნეს ცენტრების საშუალო ვაკანტურობა 13.6%-ია და წინა პერიოდთან შედარებით 0.1%-ითაა შემცირებული.
მომზადებულ დოკუმენტში ასევე საუბარი მოიჯარეების პოტენციური მიგრაციაზე. კვლევაში ვკითხულობთ, რომ პროფესიულ, საბანკო, სამშენებლო და სავაჭრო სერვისებს ბიზნეს ცენტრების კატეგორიების მიქსის 61% უკავიათ. პანდემიის პირობებში, რისკიანობის მიხედვით პროფესიული და საფინანსო სექტორები ნაწილობრივი რისკის ზონაში ხვდებიან, რაც ნიშნავს იმას, რომ მოკლევადიან პერიოდში ამ სექტორის გარკვეულ ნაწილზე და მათ მეიჯარეებზე არსებული კრიზისი უარყოფითად აისახება.
Colliers International“-ში ორმხრივი მოძრაობას ელოდებიან. მათი ინფორმაციით, მოიჯარეები, რომლებსაც აღნიშნული კრიზისი ნაკლებად შეეხოთ ძირითადად თავმოყრილია B და უფრო დაბალი კლასის ბიზნეს ცენტრებში. ამ შემთხვევაში მოსალოდნელია ამ ოფისების მაღალი კლასისკენ მიგრაცია, ძველი საიჯარო პირობების ფარგლებში. ხოლო მოიჯარეები, რომლებიც მაღალი რისკის ზონაში ხვდებიან მოსალოდნელია რომ გადაინავლებენ დაბალი კლასის ბიზნეს ცენტრებში ან ინდივიდუალურ ფართებში.