„სითი მოლ საბურთალოს“ და „სითი მოლ გლდანს“ მფლობელი კომპანია IG Development Georgia, პარლამენტში ინიციირებულ კანონპროექტს, რომელიც განბაჟების ზღვრის 300-ლარიანი ნიშნულიდან 700 ლარამდე გაზრდას გულისხმობს, განცხადებით ეხმიანება და აცხადებს, რომ აღნიშნული კანონპროექტის დამტკიცება ქვეყნის ეკონომიკასა და ბიზნესს მნიშვნელოვნად დააზიანებს, რადგან საცალო ვაჭრობის სექტორში შემავალი კომპანიები არასამართლიანი კონკურენციის პირობებში აღმოჩნდებიან, იმიტომ რომ მათ გადასახადების გადახდა 1-დან 700 ლარამდე ღირებულების პროდუქციის იმპორტზეც სრულად უწევთ, კანონპროექტის დამტკიცების შემთხვევაში კი, ბაზარზე გაიზრდება ისეთი მოთამაშეების რაოდენობა, რომლებიც გადასახადების გადახდას თავს აარიდებენ და აღნიშნულ კანონს არასამართლიანი უპირატესობის მისაღებად გამოიყენებენ.
„ნივთის ონლაინ გამოწერის განბაჟების ზღვრის გაზრდა გამოიწვევს საცალო ვაჭრობის ადგილობრივ ბაზარზე სარეალიზაციო პროდუქციის მოთხოვნის შემცირებას, შესაბამისად, შემცირდება ადგილობრივი რეალიზაციები და ადგილობრივი სავაჭრო ობიექტების შემოსავლები, რაც, თავის მხრივ, შეამცირებს სახელმწიფო ბიუჯეტში საიმპორტო და სხვა გადასახადების სახით მისაღებ თანხებს, აღნიშნული ადგილობრივ მოვაჭრეებს არათანაბარ მდგომარეობაში აყენებს. წარმოდგენილი ინიციატივით ვამცირებთ არა მარტო საბიუჯეტო შემოსავლებს, ასევე ვზრდით სამუშაო ადგილების შემცირების რისკს“, - წერია განცხადებაში.
საქართველოს პარლამენტში ალეკო ელისაშვილისა და ლევან იოსელიანის მიერ ინიციირებულია კანონპროექტი, რომლის თანახმად, შესაძლოა განბაჟების გადასახადისგან გათავისუფლდეს 700 ლარამდე ღირებულების, 30 კილოგრამამდე საერთო წონის საქონლის საფოსტო გზავნილი.
მიმდინარე წლის მაისში გადამზიდავმა კომპანია USA2GEORGIA -მ მომხმარებელთა ინტერესების დაცვის მიზნით დაიწყო კამპანია, რომელიც ასევე შეძენილი პროდუქციის განბაჟების 300 ლარიანი ზღვარის 700 ლარამდე გაზრდას გულისხმობდა და წერდა, უცხოური ვალუტის გაცვლითი კურსის მატებამ ლართან მიმართებაში მნიშვნელოვანი გავლენა მოახდინა 300 ლარიან ზღვარზე და მძიმე ტვირთად აწვება მომხმარებელს. აღნიშნული მოთხოვნით USA2GEORGIA ონლაინ ხელმოწერებსაც აგროვებდა.