„გამომდინარე იქიდან, რომ ამ ერთი წლის მანძილზე ჩვენს სექტორსა და სახელმწიფოს შორის სწორი კომუნიკაცია არ ყოფილა, 50-60 გასართობი ცენტრი გაკოტრდა და დაიხურა, რაც იმას ნიშნავს, რომ 3000-მდე ადამიანი, მათ შორის სტუდენტები უმუშევრები დარჩნენ“ -  ამის შესახებ, რადიო „კომერსანტის“ გადაცემაში „კომერსანტის დილა“ გასართობი ცენტრების ასოციაციის დამფუძნებელმა გიორგი მთიულიშვილმა ისაუბრა.

გიორგი მთიულიშვილმა აღნიშნა, რომ სწორი კომუნიკაციის შემთხვევაში გასართობ ცენტრებს სუბსიდირება შეეხებოდა და ათეულობით ობიექტი არ დაიხურებოდა.

„სხვა ბიზნესების მსგავსად, ჩვენს სექტორსაც სახელმწიფოსთან კომუნიკაცია რომ ჰქონოდა, ჩვენს სათქმელს სახელმწიფომდე მივიტანდით და თამაშგარე მდგომარეობაში არ ვიქნებოდით . იმ 3000 -მდე ადამიანს კი დღეს სამსახურის ძებნა აღარ მოუწევდა.

ობიექტების დახურვა არ ნიშნავს იმას, რომ შუქი ჩააქრო და წახვიდე, წყალი უნდა გქონდეს აუცილებლად, უნდა მიხვიდე, სისუფთავე დაიცვა რათა, როდესაც ობიექტს მუშაობის განახლების ნებართვა მიეცემა, სტუმრებს სისუფთავე და წესრიგი დახვდეს. ობიექტის შენახვის ხარჯი დაახლოებით 2000-3000 ლარამდეა, რადგან დაცვა სჭირდება,  კომუნალური გადასახადებიც გადასახდელია, შესაბამისად სექტორის დაახლოებით 30%-მა ამ გადასახადებს ვერ გაუძლო და დაიხურა.

სამწუხაროდ, სახელმწიფოს და ბიზნეს სექტორს შორის კომუნიკაცია არ არის და მათ შორის ხიდია ჩატეხილი, არ ვიცი ჩვენ მგლები ვგონივრთ და ფიქრობენ, რომ არ შეგვიძლია საკუთარი სათქმელის მიტანა თუ რა ხდება, ეს უნდა გამოსწორდეს, თორემ ხვალ პანდემია აღარ იქნება და შეიძლება სხვა პრობლემა გაჩნდეს, ამიტომ სახელმწიფოსთან კომუნიკაცია უნდა გვქონდეს.

თუ აქცია არ მოაწყვე და გარეთ არ გამოხვედი, ყურადღებას არავინ გაქცევს, ამიტომ ეს ხიდი თუ არ აღდგა, ქვეყანა ვერ აშენდება. მე შეიძლება სხვა ბიზნესი ვაკეთო, მაგრამ ეს ხომ არ ნიშნავს იმას, რომ ქვეყანას ეშველება. დიალოგი რომ არ შედგა, ამან ძალიან დიდი ზარალი მიაყენა ამ ახალბედა სექტორს, რომელიც 10 წელია ყალიბდება.“ -  აღნიშნა გიორგი მთიულიშვილმა

გიორგი მთიულშვილის განმარტებით, სექტორმა სახელმწიფოსგან მიიღო ნებართვა, რომ იმ ცენტრებმა, რომლებსაც სარესტორნო სტატუსი აქვთ, მუშაობა განაახლონ. იმ შემთხვევაში კი თუ არსებული ეპიდსიტუაცია შენარჩუნდება და ვირუსის გავრცელების მაჩვენებელი 4%-ს არ ასცდება, სექტორს დაბადების დღეების გადახდის უფლებაც ექნება.

„ვფიქრობთ, რომ ეს იმ დარჩენილ 150 ბიზნეს ობიექტს გადაარჩენს, რადგან როდესაც სახელმწიფომ დახურული სივრცეების გახსნა დააანონსა, ჩვენთან მეიჯარეები მოვიდნენ და იჯარის გადახდა მოგვთხოვეს. გუშინდელი შეხვედრა ჩვენთვის ძალიან მნიშვნელოვანი იყო, რადგან ამ შეხვედრას მთელი წლის მანძილზე ვითხოვდით და ჯობდა ადრე მომხდარიყო. წლის განმავლობაში რომ მთავრობასთან სწორი კომუნიკაცია გვქონოდა არც იმ 50 ობიექტს მოუწევდა დახურვა.“ -  აღნიშნა გიორგი მთიულიშვილმა.

მისივე განცხადებით, ის რეგულაციები, რაც სახელმწიფომ გასართობ ცენტრებს დაუწესა, მათთან პანდემიის დაწყებამდეც დაცული იყო, უბრალოდ მას ჩამკეტი მექანიზმი დაემატა, რაც რესტორნების შემთხვევაში მაქსიმუმ 60 ადამიანის დაშვებას გულისხმობს, მთიულიშვილი ფიქრობს, რომ გასართობი ცენტრების შემთხვევაში ეს ლიმიტი ნაკლები იქნება.

ჩვენი ობიექტების გახსნა ყველაზე მარტივი და უდანახარჯო იქნება. ჩვენს სექტორში დაახლოებით 200 ობიექტი იყო და 7000-8000 მდე ადამიანი ჰყავდა დასაქმებული. აქედან დაახლოებით 70% იყვნენ სტუდენტები, ჩვენ მცოცავი გრაფიკი გვქონდა და სტუდენტების რეჟიმს ვერგებოდით.

თუ არ ჩავთვლით ქვეყანაში არსებულ ფინანსურ ფონს, ჩვენს სერვისზე მოთხოვნა მაინც არის, რადგან მთელი წელია ბავშვები სახლში არიან გამოკეტილები და მათ გარემოს შეცვლა და სიახლე სჭირდებათ, მართალია სკოლები გაიხსნა და ბავშვები სახლებიდან გავიდნენ, მაგრამ ჩვენი პროფილი განსხვავებულია, აქ ბავშვი ენერგიას ხარჯავს, კონკრეტული კუთხით განათლებასაც იღებს, ასევე ეს მათი მშობლებისთვისაც განტვირთვაა, თან ბავშვებს აქცევენ ყურადღებას თან მეგობართან ერთად ყავის დალევის და საუბრის შესაძლებლობაც აქვთ“ -  აღნიშნა გიორგი მთიულიშვილმა.

თაკო კვაჭანტირაძე